Soltüstık Казахстан
Жерлесіміз Руслан Мұстафин халықаралық ән байқауында еліміздің атынан өнер көрсетіп, жоғары нәтижеге қол жеткізді. Өнер иесі Чехияда өткен халықаралық “Арт Дуо” байқауында 1-орынға ие болды.
Өнер колледжінің түлегі бүгінде Астана қаласындағы “Шабыт” ұлттық өнер университетінде білімін жалғастыруда.
– Осындай додалардың тәжірибе жинақтауға көмегі зор. Біздің өңірден шыққан Ермек Серкебаев сынды ағаларымдай өнер саласының биігінен көрінуді армандаймын, – дейді түрлі халықаралық және республикалық конкурстардың лауреаты.
Жүзден жүйрік атану Русланға оңай болған жоқ. Алты мемлекеттің үздік деген жас опера әншілері – бұған дейін де өзге байқауларда көзге түсіп, шыңдалған таланттар. Жерлесіміз итальян, орыс тілдерінде ария орындап, бірден қазылар алқасының назарына іліккен. Ал халық әні “Аққурайды” тамылжыта салғанда, өнерпаздың жоғары кәсіби шеберлігіне тәнті болыпты.
– Күнделікті қажырлы еңбектің арқасында ғана нәтижеге қол жеткізуге болады. Бұл орайда өнер колледжіндегі ұстаздарыма алғысым шексіз. Олар менің биіктерден көрінуіме жол ашып, бүгінгі күнге дейін өнер иесі ретінде шыңдалуыма септігін тигізіп келеді, – дейді жас әнші.
Гүлбике КУБЕНОВА,
“Soltústik Qazaqstan”.