Soltüstık Казахстан
Lenıngrad qalasynyń jaýdan azat etilgenine 75 jyl tolýyna oraı oblystyq qorǵanys isteri departamenti “Lenıngradtyq órenim, maqtanyshym sen ediń” degen ataýmen “dóńgelek ústel” otyrysyn ótkizdi.
– Men ol kezde kishkentaı bolsam da, bar jaǵdaıdan habardar edim. 1941 jyly soǵys bastalysymen-aq, ákem áskerı bıletin alyp, maıdanǵa attandy. Nemister Lenıngrad qalasyndaǵy Bodaev qoımasyna bomba tastady. Saldarynan shahar turǵyndary bir kúnniń ishinde azyq-túliksiz qaldy. Biz bir úzim nanǵa zárý boldyq. Lenıngradta ǵylymı-zertteý ınstıtýty, ǵylym akademııasy boldy. Sonyń bárin fashıster qurtty, – dedi Ekinshi dúnıejúzilik soǵys kezinde bar-joǵy bes jasta bolǵan jerlesimiz Irına Sıdelnıkova.
Lenıngradty nemis fashısterinen qazaqstandyqtardyń qorǵap qalǵany jóninde tarıhı derekter bar. 1941 jyldyń shilde aıynda Petropavl qalasynda qurylǵan “314-shi atqyshtar dıvızııasy” qyrkúıek aıynda Lenıngrad túbinde shaıqasqa kirisip, 1944 jylǵa deıin jaýmen arpalysty. Oblystyq memlekettik arhıvtiń dırektory Sáýle Málikovanyń aıtýynsha, Lenıngrad qalasyn jaýdan azat etken 314-shi atqyshtar dıvızııasynyń quramynda bolǵan júzden astam jaýyngerdiń esimi anyqtalyp, olar týraly málimet sandyq formatqa engizildi. Sondaı-aq, arhıvte dıvızııa komandıri Afanasıı Shımenkonyń jáne basqa jaýyngerlerdiń estelikteri saqtalǵan. Tarıhshylardyń málimetinshe, dıvızııa quramynda 1941 jyldyń ózinde-aq on myńnan astam qazaqstandyq bolǵan. Olar jaıly málimetter negizinen Reseıdiń Qorǵanys mınıstrliginiń arhıvinde saqtalǵan.
Aıman ÁBJAPBAROVA, oblystyq qorǵanys isteri jónindegi departamenti baspasóz qyzmetiniń basshysy.