Soltüstık Казахстан
О́ńirimizde “Qyzyljar dámi” gastronomııalyq festıvali jalǵasyn tabýda. Buqaralyq aqparat quraldarynyń ókilderi festıvalǵa qatysýshy “Piccolino” jáne “Ognı Kaspıa” dámhanalary usynǵan taǵamdardan dám tatty.
Atalmysh festıvaldi “SQO restoratorlar men otelerler qaýymdastyǵy” qoǵamdyq birlestigi uıymdastyryp otyr. Erejege sáıkes aqpannyń 22-sine deıin Petropavl qalasynyń turǵyndary men qonaqtary tizimge engen 21 meıramhana men dámhana usynǵan 5-7 taǵamdy 3999 teńgege satyp alý múmkindigine ıe. Búgingi kúnge deıin tómendetilgen baǵamen usynylǵan taǵam túrlerin 50-den astam tutynýshy satyp alǵan. “Qyzyljarda etti joǵary deńgeıde ázirleıtin aspazdar bar. Olar da sharaǵa qatysýǵa tilek bildirdi. Máselen, “Aq Otaý” meıramhanasy daıyndaǵan qazaqtyń bas taǵamy kóptiń kóńilinen shyǵýda”, – dedi qoǵamdyq birlestiktiń tóraǵasy Saıran Hamzın.
Festıval aıasynda “Meıirim tabaǵy” qaıyrymdylyq aksııasy ótýde. Dámnen aýyz tıgen árbir turǵynnyń 500 teńge kólemindegi qarjysy atalmysh shara aıaqtalǵan soń az qamtylǵan otbasylarǵa tabystalady.
Gúlbıke KÝBENOVA, “Soltústik Qazaqstan”.