“Жас Отан” жастар қанатының өкілдері мен гуманитарлық –техникалық колледж студенттері отбасылық үлгідегі балалар ауылының тәрбиеленушілерімен кездесіп, оларға мерекелік көңіл күй сыйлады.
– Біз балалардың көңілін көтеріп, естен кетпес ерекше кеш ұйымдастыруды ұйғардық. Ойын ойнап, тәрбиеленушілерді сергітіп, олармен пікір алмасуға да көңіл бөлдік, – деді “Жас Отан” жастар қанаты облыстық филиалының жетекшісі Абылайхан Қайроллаев.
Балаларға қонаққа келген жастар концерт ұйымдастырып, өз қолдарымен жасаған естелік сыйлықтарын тарту етті. Гуманитарлық-техникалық колледж студенті Нүрила Артықбай Жастар жылының маңызына тоқталып, өскелең ұрпақ бір-бірін қолдап, еліміздің көркеюіне өз үлесін қосуы тиіс екенін айтты.
Бүгінде отбасылық үлгідегі балалар ауылында 6 мен 18 жас аралығындағы 39 тәрбиеленуші бар.