Soltüstık Казахстан
“Uly dala jaýharlary” atty áleýmettik joba aıasynda oblystyq beıneleý óneri murajaıynda alǵash ret kórý qabileti tómen adamdarǵa arnalǵan kórme uıymdastyryldy. Sharaǵa tanymal sýretshiler týyndylarynyń barelef-kóshirmesi qoıyldy. Oqýshylar saraıyndaǵy kórkemsýret mektebiniń tárbıelenýshileri atalmysh kórmege arnaıy on tórt kartına ázirlegen.
Kórmede kartınalardyń eki birdeı nusqasy usynylǵan. Birinshisi – sýretshiniń ózi salǵan túpnusqa bolsa, ekinshisinde zaǵıp jandar úshin arnaıy jasalǵan kóshirmesi. Osylaısha, kózi nashar kóretin jerlesterimiz Ábilhan Qasteev, Áýbákir Ysmaılov, Jańataı Shardenov pen Sahı Romanov syndy belgili óner ıeleriniń jumystaryn qolmen ustap, baǵalaı aldy. Ár týyndy astynda Braıl shrıftimen jazylǵan anyqtamalyq aqparat usynylǵan. Sharany uıymdastyrý barysynda murajaı qyzmetkerlerine biraz eńbektenýge týra kelipti.
– О́tken jyly Almatydaǵy Ábilhan Qasteev atyndaǵy murajaıda bolǵanymyzda osyndaı týyndylardy kórgen edik. Keıin bul ıdeıany óz óńirimizde qolǵa alýdy jón sanadyq, – dedi murajaı qyzmetkeri Jibek Júzenova.
Kórme bir aı boıy jalǵasady.
Gúlbıke KÝBENOVA, “Soltústik Qazaqstan”.