Soltüstık Казахстан
“Qyzyl jarty aı” qoǵamy men “Forte bank” aksıonerlik qoǵamy birlesip, oblysymyzdyń órtten, tasqyn sýdan zardap shekken 300-den astam turǵynyna materıaldyq kómek kórsetti.
Áleýmettik jaǵynan az qamtylǵan otbasylar, qarttar men kópbalaly analar da qoldaýdan qalys qalmady.
Zardap shekken otbasylardyń árqaısysyna 270 myń teńge qarjy berilip, dári-dármekpen, kıim-keshekpen qamtamasyz etildi.
“Qyzyl jarty aı” qoǵamy oblystyq fılıalynyń dırektory Sáýle Orazova: “Atalmysh jobanyń basty maqsaty – tabıǵat apaty áserinen úısiz qalǵandarǵa qol ushyn sozý. Osy oraıda kópbalaly jáne az qamtylǵan otbasylardy birinshi orynǵa qoıdyq. Óńirimizde oryn alǵan sý tasqyny egis alqaptaryn da shaıyp ketti. Baýbaqsha ıelerine de qoldaý kórsetýdemiz”, – deıdi. Óńirimizdegi kómekke muqtaj jandarǵa 8,2 mln. teńge jumsalmaq.
Alına NURTAZINA, “Soltústik Qazaqstan”.