Soltüstık Казахстан
«Динамо» дене шынықтыру-спорт қоғамының жыл сайынғы спартакиадасында погон таққан спортшылар самбодан белдесті. Екі күнге созылған жарыс нәтижесінде үздіктер анықталды.
«Динамо» дене шынықтыру-спорт қоғамының спорт залында облыстың 15 дене шынықтыру ұжымының спортшылары жиналды. «Динамо» дене шынықтыру-спорт қоғамының облыстық филиалының бас маманы Галина Скорыхтың айтуынша, жарыстар 57 кг бастап 100 кг астам аралығындағы сегіз салмақ санаты бойынша өтті.
Жарыс қорытындысында командалық есепте бірінші жүлделі орынды облыстық полиция департаментінің жылдам әрекет ету арнайы жасағының жауынгерлері алды. Екінші орын ұлттық қауіпсіздік комитетінің облыстық департаментіне бұйырды. Үшінші орында – 6637 әскери бөлімінің командасы. «Жеңіске деген ұмтылысы үшін» аталымы бойынша – Тайынша аудандық полиция бөлімінің полицейі Ақан Бақытбек, «Үздік техника» аталымында арнайы жасақ инспекторы Қайырбек Батырхан марапатталды. Аудандық полиция бөлімдерінің арасында бірінші орынды – Уәлиханов аудандық полиция бөлімінің командасы, екінші орынды – Тайынша ауданының полиция бөлімі, үшінші орынды Шал ақын ауданы полиция бөлімінің командасы жеңіп алды. Жеңімпаздарға кубок пен грамоталар табысталды. Тамыз айында Қызылорда қаласында өтетін ҚР ІІМ чемпионатына қатысу үшін ең үздіктердің арасынан құрама команда жасақталатын болады.
http://petropavltv.kz