Soltüstık Казахстан
Біз газетімізде есімі елімізге белгілі жазушы-журналист, “Қызылжар-Ақпарат” жауапкершілігі шектеулі серіктестігінің директоры Жарасбай Сүлейменовтің “Дара жол” атты деректі хикаятын үзбей ұсынып келеміз. Автордың бұл шығармасы жуырда кітап болып басылып шықты.
“Дара жол” деп аты айтып тұрғандай, қазақтың арғы-бергі тарихында небір тар жол, тайғақ кешулерден өтіп, сарқылмас қажыр-қайратымен, ұлағатты дәстүр-салтымен, туған еліне, ұлтына деген шынайы махаббатымен, адал қызметімен дараланған, жүріп өткен жолы кейінгілерге үлгі ретінде ұсынуға лайық әулеттердің аз болмағаны мәлім. Алайда, қанкешті тарихымыздың қойнауына сүңгіп кеткен олардың біразын оқырман қауым түгел дерлік біле бермейді. Уақыттың шаңына көміліп, көмескі тартқандары қаншама?
Жоғарыда айтып кеткеніміздей, жүріп өткен жолы өнегелі саналған әулеттердің қатарына өңірімізден шыққан Барлыбай Шәукерұлының ұрпақтарын жатқызуға болады. Сонау патша билігі тұсында бір әулеттен шыққан Тәбей, Итемір, Қожахмет, Тәшмұхамет, Күзембай, Әлти, Сәдуақас, Сейітахмет Барлыбаевтар ел билеп, халқына қамқоршы бола білсе, олардың кейінгі ұрпақтары да биліктің барлық буындарында іскерлікпен танылып, жұртшылықтың ықыласы мен құрметіне бөленді. Жуық арада қолдарыңызға тиетін туған еліміздің ұшантеңіз тарихының бір тамшысындай ғана бұл кітапқа ұрпақтар ісіндегі сабақтастық алтын арқау болып өрілген.
“Ақ дегені – алғыс, қара дегені – қарғыс” болған большевиктер қазақтың талай әулетінің шаңырағын ортасына түсіріп, бірін мал-мүлкінен, енді бірін бала-шағасынан айырмады ма? Сол замандары қазақтың көп әулетінің, ардақты арыстарының тамырына сілтенген балта бүгінгі жас ұрпақ үшін ертегі сияқты көрінуі мүмкін. Осы тұрғыдан алып қарағанда, бұл туындының орны бөлек.
Бір айта кетерлігі, кітап қазақ және орыс тілдерінде ұсынылып отыр. Сонымен қатар туындыдағы Барлыбай әулетінің шежіресі де көп жайттан хабар береді. Ендеше, сонау тарихтан сыр суыртпақтап, оқырманның алдына біраз жайтты жайып салатын кітаптың оқылымды болары шүбәсіз.
Нұргүл ОҚАШЕВА,
“Soltústik Qazaqstan”.