Soltüstık Казахстан
Петропавл қаласында “Спорт менің ауламда” атты акция өткізілуде. Бұл шара барысында жергілікті үздік спортшылар және командалар облыс орталығының аулаларында жас ұрпақ өкілдерімен кездесіп, өздерінің жетістіктері туралы айтып, тәжірибелерімен бөлісуде.
– Біздің орталықтың ұйымдастыруымен қаламызда осындай шара өтуде. Басты мақсат – өскелең буынның бойында саламатты өмір салтын насихаттау және олардың спортпен шұғылдануға деген қызығушылығын арттыру. Акция барысында қатысушылардың спорт саласында мақтануға тұрарлық жетістіктерге қол жеткізген жерлестерімізбен кездесуі жоспарланған. Меймандар өз кезегінде балғындарды спорт әлемімен таныстырып, шеберлік сағаттарын өткізетін болады. Мысалы, өткен аптада балалар “Қызылжар” футбол және “Құлагер” клубтарының ойыншыларымен, грек-рим күресінен ел біріншіліктерінің үш дүркін жеңімпазы, әскерилер арасында өткен әлем чемпионатының қола жүлдегері Аманғали Бекболатовпен жүздесті, – дейді қалалық жастар ресурстық орталығы басшысының міндетін атқарушы Азат Мұхамеджанов.
Осы акция облыс орталығының он ауласында өткізілуде. Шара тамыз айының соңына дейін жалғаспақ.