Soltüstık Казахстан
“Атамекен” Ұлттық кәсіпкерлер палатасы Іскер әйелдер кеңесінің төрайымы Ләззат Рамазанова бір сөзінде: “Қазір еліміздегі шағын және орта бизнес субъектілерінің 50 пайызы әйелдерден тұрады. Бұл көрсеткіш осыдан бір жарым жыл бұрын 31 пайыз еді”, – деген болатын. Демек, елімізде кәсіпкер әйелдердің саны жыл сайын артып келеді. Бизнес саласында табысқа кенеліп, отбасы мен бала тәрбиесін де ақсатпай қатар алып жүрген іскер жандар біздің өңірде де аз емес. Солардың қатарында Айыртау ауданындағы Саумалкөл ауылында тұратын Жанна Мұхамедьянованы да атауға болады.
Жанна Тоқтарқызы осыдан сегіз жыл бұрын қолға алған кәсібін кеңейтіп, бүгінде аудан жұртшылығына ісін тыңғылықты жүргізетін табысты кәсіпкер ретінде танылып отыр. Айтулы жетістікке жетіп жүрген нәзік жан бизнесін тәтті тоқаш пісіруден бастаған. Оның дәмі мен безендірілуі жағынан нағыз кондитердің өнімдерінен кем түспейтін тәттілері бүгінгі күні саумалкөлдіктердің дастарқанының сәні десек, артық айтқандығымыз емес. Бизнесті игеруге деген ұмтылысы ерекше болса керек, түрлі курстарда біліктілігін арттырған Жанна көп ұзамай мемлекеттің қаржылай қолдауына ие болды. Бүгінде кейіпкеріміз балаларының оқуы мен тәрбиесіне де қарап, жеке кәсіпкерлікпен де айналысып, бәріне үлгеріп жүр. Ол былтыр аудан орталығында ұйымдастырылған кондитерлер курсын тамамдап, “Атамекен” ҰКП арқылы 100 айлық есептік көрсеткіш көлемінде қайтарымсыз грантқа ие болды. Бүгінде осы қаражатқа сатып алған азық-түлік кондитер құрылғысының көмегімен торттан басқа тәтті нан, пицца және бәліш әзірлейді.
– Табысты болу үшін, ең алдымен, өз кәсібіңе деген қызығушылық болуы қажет. Оны дамыту жолдарын іздеп, бар күш-жігеріңді бизнесіңнің өркендеуіне жұмсау маңызды. Сонда ғана ісің алға басып, табысың да молаяды, – дейді Жанна Тоқтарқызы.
Кәсіп иесі алдағы уақытта облыстың өзге аудандарында да өнімдерін сатылымға шығармақ. Осы мақсатта шағын несие алып, оған қажетті құрал-жабдықтар сатып алуды көздер отыр. Сонымен қатар тағы да аспаздыққа бейім бірнеше адамды жұмыспен қамту ойында бар.
“Атамекен” Ұлттық палатасы өңірлік филиалы өкілдерінің айтуынша, жергілікті тұрғындардың, әсіресе, әйелдер арасындағы жұмыссыздықты жоюдың бірден-бір тиімді жолы тамақ өнеркәсібін дамыту. Бұл саланың өнімдеріне деген сұраныс та жоғары. Екі жыл қатарынан “Атамекен” Ұлттық кәсіпкерлер палатасы кәсіпкерлерге қаржылай қолдау жасап, көмек қолын созып келеді. Осы уақыт аралығында ақпараттық қамтамасыз ету бойынша облыс орталығы мен аудандарда 400-ден астам әйел семинарлар мен курстарға қатысқан. 167 нәзік жанның “Жас кәсіпкер” жобасы бойынша кеңес алғанын атап өткен жөн.
Гүлбике КУБЕНОВА, “Soltústik Qazaqstan”.
СУРЕТТЕ: Ж.Мұхамедьянова.
Суретті түсірген Талғат ТӘНІБАЕВ.