ЖАҢАЛЫҚТАР

Soltüstık Казахстан

 Kyzylzhar_akparat@mail.ru

Токио төрінде өтеді

Биылғы жылдың 25 тамызы мен 1 қыркүйегі аралығында Жапонияның астанасы – То­кио­да дзюдодан әлем чемпионаты өтеді. Бұл сайыста әлемнің 143 елінің 552 спортшысы татамиде өзара мықтыны анықтайды.

Қазақстан әйелдер ұлттық құрама командасы да әлем біріншілігіне қатысады. Токио татамиінде Галбадрах Отгонцэцэг (48 кг.), Анна Казюлина (52 кг.), Севара Нишанбаева (57 кг.), Иоланта Бердібекова (63 кг.), Мөлдір На­ры­­нова (70 кг.), Зарина Райфова (78 кг.), Назгүл Ма­ра­това (78+ кг.) ел намысын қорғайтын болады.
Былтырғы әлем біріншілігінде қыздар құрамасынан Галбадрах Отгонцэцэг қана қола жүлде еншілеген болатын.

“Барыстың” бағы жанды

Өткен аптада Нұр-Сұлтан қаласындағы “Барыс Арена” мұзсарайында хоккейден Қазақстан Президенті кубогы өз мәресіне жетті. Елорданың “Барыс” клубы алғашқы үш ойында қарсыластарынан басым түсіп, Президент кубогының жеңімпазы атанды.
Биылғы бәсекеде бес команда бақ сынады. Құрлықтық хоккей лигасына дайындық турниріне “Барыс” (Нұр-Сұлтан қ.), “Ак Барс” (Қазан қ.), “Нефтехимик” (Нижнекамск қ.), “Ав­томобилист” (Екатеринбург қ.) және “Салават Юлаев” (Уфа қ.) клубтары қатысқан болатын.
“Барыс” алғашқы кездесуін “Ак Барспен” өткізді. Құрлықтық хоккей лигасының үш дүркін же­ңім­пазына қарсы өткен ойында жерлес­теріміз 6:1 есебімен басым түсті. Екінші ойынын “Нефтехимик” клубына қарсы өткізіп, камбэк жасады. Кездесудің бірінші кезеңінде 1:3 есебімен ұтылып жатқан елорда командасы ойын соңында жігер танытып 5:3 есебімен жеңісті қарсыластан жұлып алды. Ал “Автомобилист” командасымен аса тартысты өткен матчта “Барыс” 3:2 есебімен басым түсті.

Өз тобында көш бастады

Шымкенттік “БИІК-Қазығұрт” әйелдер футбол командасы сырт алаңда өткен Чемпиондар лигасының екінші іріктеу кезеңінде эстониялық “Флораны” жеңіп, келесі кезеңге шығу мүмкіндігін арттыра түсті.
Бірінші іріктеу кезеңінде біздің команда Фарер аралдарынан келген “ЭБС/Скала” командасын 9:0 есебімен ойсырата жеңген болатын. Эстонияда өткен бұл жолғы кездесу де қазақстандық команданың жеңісімен аяқталды. Матчтың 13-ші және 19-шы минуттарында мергендік танытқан Алина Литвиненко дубль авторы атанды.
Осылайша, шымкенттік команда екінші мәрте жеңіске қол жеткізіп отыр. Бұл біздің команданың 6 топта көш бастауына мүмкіндік берді. Топ жеңімпазы Чемпиондар лигасының 1/16 кезеңіне жолдама алады.