Soltüstık Казахстан
“Burabike Fest – 2019″ спорттық-сазды фестивалі аясында ұйымдастырылатын қайырымдылық шарасынан түскен қаржының бір бөлігі Қызылжар аудандық ауруханасына жұмсалмақ. Емдеу мекемесі жақында жаңа медициналық құралдармен қамтамасыз етіледі.
Ауданға қарасты 61 елді мекеннің елу мыңға жуық тұрғыны Бескөлде орналасқан емдеу мекемесіне медициналық көмекке жүгінеді. Аудандық аурухананың бас дәрігері Александр Құдайбергеновтің айтуынша, медициналық мекеменің құрал-жабдықтармен қамтамасыз етілуі елу пайыздан да аспайды. Емдеу ұйымын заманауи құралдармен жабдықтау үшін аурухана белгілі кәсіпкер Болат Өтемұратовтың қорынан көмек сұраған.
Бүгінгі таңда аурухананың жан сақтау бөлімшесінің науқастары үшін жасанды тыныс алу аппараты қажет. Қазір екі аппарат болғанымен, олар жеткіліксіз. Өйткені, бір жылда шамамен бес жүзге жуық науқас қарқындытерапиялық ем алады. Соның үштен бірі жасанды тыныс алу аппаратының көмегін пайдаланады.
– Өкпені жасанды желдендіру аппараты жан сақтау бөлімшесінде ең маңызды құрал болып саналады. Қарқынды терапияда төрт орын болғанымен, екі аппарат қана бар. Егер жағдайы ауыр науқас түссе, біз тығырыққа тірелеміз. Жан сақтау бөлімшесі ешқашан науқастан арылған емес. Жүрек талмасы аурулары бар науқастар жиі түседі. Әсіресе, қыс айларында қауіп зор. Жолдың бойында орналасқандықтан, жол-көлік оқиғалары салдарынан зардап шеккендер бізге жеткізіледі, – деді аудандық аурухананың анестезиолог-реаниматолог дәрігер Ерлан Мәкенов.
Болат Өтемұратов қорының ұйымдастыруымен тамыз айының соңында өтетін “Burabike Fest – 2019″ қайырымдылық фестивалінің қорытындысы бойынша ауруханаға жасанды тыныс алу аппараты сатып алынатыны көңілге қуаныш ұялатты. Ал жыл сайын спорт сүйер қауымның қайырымдылық көмек көрсетуі көптеген адамның өмірін құтқарып қалуға үлкен септігін тигізіп отырғанын тілге тиек еткен жөн. Өткен жылы меценаттардың көмегімен қайырымдылық аукционынан 205 миллион теңге жиналып, еліміз бойынша бес аудандық ауруханаға қажетті құралдар сатылып алынды.