Soltüstık Казахстан
Петропавл қаласындағы Сәбит Мұқанов атындағы облыстық ғылыми-әмбебап кітапханада “ҚР Конституциясы: Қазақстанның Тәуелсіздікке жету барысындағы тарихи жолы” атты викторина өтті. Оған облыстық жастар бастамалары орталығының, “Қоғамдық даму және ақпарат орталығы” коммуналдық мемлекеттік мекемесіндегі жастар бастамалары бөлімінің, Петропавл қаласының жастар ресурстық орталығының, “Жасыл ел” республикалық жастар еңбек жасақтарының штабы” мекемесінің СҚО бойынша филиалының және өңіріміздегі Қазақстан халқы Ассамблеясының өкілдері қатысты.
Бұл шара барысында қатысушылар Ата заңымыз және еліміздің тарихынан сыр шертетін сұрақтарға жауап беріп, тапсырмаларды орындады.
Викторинаның қорытындысы бойынша бірінші орын жастар бастамалары орталығының командасына бұйырды. Қазақстан халқы Ассамблеясының намысын қорғаған азаматтар – екінші, ал қалалық жастар ресурстық орталығының өкілдері үшінші орынға ие болды.
Жеңімпаздар мен жүлдегерлерге дипломдар және бағалы сыйлықтар табыс етілді.