Soltüstık Казахстан
Өңір полицейлері жаңа оқу жылы қарсаңында «Абайлаңыз – балалар!» жедел-алдын алу іс-шарасын өткізуде. Операцияның мақсаты – балалардың жол-көлік апаттары салдарынан жарақаттануының алдын алу.
Тамыздың 31-не дейін жалғасатын шараның алғашқы кезеңінде тәртіп сақшылары білім ордаларының маңындағы инфрақұрылымды зерттеуде. Олар жол белгілерінің жағдайын тексеріп, жасанды кедергілер орнатудың қажеттілігін қарастырады. Бұған қоса кең ауқымды түсіндіру жұмыстары да жүргізілуде. Жол үстіндегі қауіпсіздік ережелерін полиция қызметкерлері мектеп жасына дейінгі балғындарға да айтып түсіндіруде.
«Алтын бесік» балабақшасында кішкентай балалармен сабақ өткізіліп, жолда жүру ережелерінің негізгі талаптары түсіндірілді. Жол қозғалысын реттеушінің белгілері көрсетілді және көрнекі үгіттеме-парақшалар табысталды», – деді облыстық полиция департаментінің жергілікті полиция қызметі басқармасының аға инспекторы Баян Байғаскина.
Бүлдіршіндер тәртіп сақшыларымен бірге жол қозғалысын реттеушінің дыбыстары мен жол белгілерін тағы бір пысықтады. Атап өту керек, «Алтын бесік» балабақшасында тәрбиеленушілердің жол қозғалысы ережелерін білуіне ерекше мән беріледі.
Бұдан соң полицейлер қала көшелеріне шықты. Жаяу жүргіншілер өткелінен велосипедшілер көліктерінен түсіп, жаяу жүргіншілер құлаққаптарын шешіп, ал ата-аналар балаларын жетектеп өтулері тиіс. Осы қарапайым ережелерді көпшілік біле бермейді. Сондықтан полицейлер велосипедшілер мен жаяу жүргіншілерге жол үстінде болатын қауіптің алдын алу мақсатында негізгі қателіктер туралы айтып, жадынамалар таратты.