Soltüstık Казахстан
Облыс орталығында «Спорт менің ауламда» атты жастар акциясы өтіп жатыр. Оның басты мақсаты – жас ұрпақ арасында саламатты өмір салтын насихаттау. Акция аясында өңірдің атақты спортшылары балаларға шеберлік сағаттарын ұйымдастырады. Бұл жолы жастар гір спортынан ел чемпиондары Александр Головинмен және Мария Наумовамен жүздесті.
«Қазіргі балалар бос уақытын телефонға телмірумен өткізетіні жасырын емес. Сондықтан осындай шаралардың маңызы орасан зор. Балаларды барынша спортқа тартуға тырысамыз. Бүгінгі кездесу барысында гір спортының тарихына тоқталып, жаттығулар өткіздік. Осы сынды ілкімді істер көп болсын», – деді гір спортынан ел чемпионы Мария Наумова.
Жастар ресурстық орталығы мен қалалық әкімдіктің ұйытқы болуымен «Спорт менің ауламда» акциясы жаздың басында басталған болатын. Бұған дейін де өңірдің тәжірибелі спортшыларының қатысуымен 5 кездесу өтті. «Қызылжар» футболшылары, «Құлагер» хоккейшілері мен тағы да басқа чемпиондар балаларға шеберлік сағаттарын ұйымдастырды.
«Бүгінгі күні өңірімізде спорт саласы жақсы дамып келе жатқаны қуантады. Жастар үшін көптеген жаңа спорттық нысандар бой көтерді. Осы акцияның арқасында балалардың спортқа деген қызығушылықтары арта түседі деген ойдамыз», – деп өз пікірін білдірді Петропавл қалалық дене шынықтыру және спорт бөлімінің бас маманы Жанат Мұхаметғалиев.
Бұл кездесу өз нәтижесін берген де сияқты. Балалардың көбі бұл күні гір спортымен шұғылдануға бел буды.
Аталмыш акция жылдың соңына дейін жалғасады. Ұйымдастырушылар қала аулаларында осы тақылеттес тағы 10 кездесу өткізбек.