Soltüstık Казахстан
Білім беру, денсаулық сақтау, әлеуметтік қолдау, құқық қорғау, кәсіпкерлік, тағы басқа да салалар бойынша шешімі табылмай жүрген мәселелеріңіз, көкейкесті сауалдарыңыз болса, 8-705-463-13-29 нөміріне WHATSAPP желісі арқылы хабарлама жолдай аласыздар.
Біз өз кезегімізде оқырмандарымызды толғандырған сауалдарды тиісті органдарға жолдап, олардың жауабын газет бетінде жариялайтын боламыз. Хабарлама мәтіні түсінікті жазылып, оны жолдаушының аты-жөні, мекенжайы толық көрсетілуі қажет.
Газетіміздің “WHATSAPP” желісіне Шал ақын ауданындағы Жалтыр ауылының тұрғыны Темірхан Хәкімовтен хат келіп түсті. Ол елді мекендегі ауызсудың сапасына шағымданды. Бұл туралы газетіміздің 2-ші бетінен оқи аласыздар.
“Біздің ауыл Сергеевка қаласынан 28 шақырым жерде орналасқан. Елді мекенде 67 отбасы түтін түтетіп отыр. Біраз жылдардан бері тұрғындарды толғандырып келген ауызсу мәселесі былтыр шешімін тапқан болатын. Соңғы кезде құдықтағы сүзгіштің істен шығуына байланысты судың сапасы нашарлады. Бүгінде ескі құдықтың суын ішуге мәжбүр болып отырмыз. Көлігі барлар суды аудан орталығынан тасып ішеді. Бұл жағдайдан аудан әкімдігі хабардар болса да, мәселе шешімін таппай келеді”, делінген хатта.
Оқырманымыздың бұл сұрағына Городецкий ауылдық округінің әкімі Гүлмира Көпеева былай деп жауап берді:
– Былтыр ауыл сыртында жергілікті бюджеттен бөлінген 2,5 млн. теңгеге локалды сумен қамту қосыны салынған болатын. Мәселе шешімін тауып, жалтырлықтар таза ауызсуға қол жеткізді. Алайда, үстіміздегі жылы көктемгі су тасқыны кезінде ойпаң жерде орналасқан жаңа құдық судың ортасында қалды. Маусым айының соңында құдық пен сорғы құбырын биіктету, суды сору және тағы басқа жұмыстар жүргізілді. Қазіргі уақытта жаңа құдық ақаусыз жұмыс істеп тұр. Құдық маңайының жарықтандырылмауы тұрғындар үшін біраз қиындық туғызып келген еді. Алдағы уақытта елді мекен мен құдықты байланыстыратын жол бойында электр бағандары орнатылатын болады.