Soltüstık Казахстан
Бүгінде ұстаздар қауымының алдында тұрған басты міндет – бәсекеге қабілетті ұрпақ тәрбиелеу. Осы бағытты ұстанатын дарынды балаларға мамандандырылған “ЛОРД” интернат-лицейі 25 жылдан астам уақыт ішінде жоғары көрсеткішке ие алдыңғы қатарлы білім ордасына айналды. Биылғы тамыз кеңесінде “Орта білім беретін үздік ұйым” атауын жеңіп алғанымызды қолға алынған осы жаңашылдықтар мен мектебіміздің педагогикалық ұжымының тынбай еңбектенгенінің нәтижесі деп білеміз.
Жоғары оқу орындарына түсуге арналған ҰБТ нәтижесі бойынша “Қазақстан Республикасының 100 үздік мектебі” тізіміне енгеніміз біз үшін үлкен жетістік. Ширек ғасыр ішінде мектепте 564 жас білім алып, үлкен өмірге түлеп ұшты. Түлектеріміздің 40 пайыздан астамы елімізде және АҚШ, Канада, Германия, Австрия сияқты мемлекеттерде ғылым саласында табысты қызмет етуде.
Былтыр мектебіміздің 25 жылдық жұмысын қорытындылап, мерейтойын атап өттік. Осы жылдар ішіндегі түлектеріміздің жетістіктеріне тоқталып өтсем деймін. Лицейдің оқушылары халықаралық олимпиадалар мен ғылыми жоба байқауларынан 39 медаль, республикалық олимпиадалардан 75 медаль, облыстық пән олимпиадаларынан 337 жүлделі орын жеңіп алды. 2012-2013 жылдары республикалық олимпиадаларда жоғары жетістіктерге қол жеткізгеніміз үшін “Ең үздік олимпиадалық мектеп” атағы берілсе, облыстық олимпиаданың нәтижесі бойынша “Ең үздік олимпиадалық команда” атандық. Жыл сайынғы Ұлттық бірыңғай тестілеу нәтижелері де мақтануға тұрарлық. Инновациялық үлгідегі ең үздік мектептердің қатарынан көрініп келеміз.
Мектебіміз, ең алдымен, жоғары білікті педагогикалық ұжыммен мақтана алады. Олардың бірқатары дарынды балалармен және жастармен жұмыс істеуге қатысты әлеуметтік-педагогикалық жобалар фестивальдарында жеңімпаз атанса, республикалық “Үздік авторлық бағдарлама”, физика, математика, информатика пәндері мұғалімдері арасындағы халықаралық байқауларда алдыңғы қатардан көрінген тәжірибелі мамандарымыз да бар. Мұндағы педагогтардың 27 пайызының екі жоғары білімі болса, 14 пайызы магистр, ал 81 пайызы жоғары және бірінші санаттағы ұстаздар екенін де айта кеткен жөн.
Лицейде 2014 жылдан бері қашықтан оқытатын электронды жүйе іске қосылды. Информатика пәнінің мұғалімі Иван Грызов әзірлеген бұл жүйе барша оқушылар мен ұстаздарға көмегін тигізуде. Ондағы онлайн тестер мен жиынтық бағалау тапсырмалары әрбір оқу пәнінің мақсатына қарай арнайы дайындалған. Мұғалімдер жүйеге тапсырмаларды енгізеді. Оқушы бұл материалдар арқылы жиынтық бағалауға даярланады. Жүйе арқылы тестілеудің нәтижелері шығып, мұғалімдер оны “Күнделік” электронды журналына енгізеді. Яғни, бұл жүйе ұстаздарымызды қағазбастылықтан арылтты десек те болады.
Негізгі пәндерді ағылшын тілінде оқыту тәжірибесі қолға алынған 29 мектептің қатарына кіргенімізге он жылдан асты. Қазіргі таңда оқушыларымыз физика, биология, информатика пәндерін ағылшын тілінде меңгеруде. Бес педагог маман “USTAZ Professional Learning Centre” жауапкершілігі шектеулі серіктестігінде, “Назарбаев университеті” және “Өрлеу БАҰО” акционерлік қоғамдарында қайта даярлау курстарынан өтті.
Бүгінде білім беру жүйесінің алдында балалар мен жастарды саламатты өмір салтын ұстануға шақырып, бұл үшін оқыту үрдісіне тиімді әдіс-тәсілдерді енгізу міндеті қойылып отыр. Бұл бағытта біз жергілікті кәмелеттік жасқа толмаған жасөспірімдердің ісі жөніндегі инспекциямен, балаларға қосымша білім беру, мәдениет, дене шынықтыру және спорт, тағы басқа ұйымдармен бірлесіп жұмыс істейміз.
Біз қоғамда орын алып жатқан жайттарға бейжай қарамайтын, үн қосатын белсенді азаматтарды тәрбиелеуді мектеп қабырғасынан бастауға тиіспіз. Жастардың көшбасшылық қабілеттерін де осы кезден қалыптастырған жөн. Сондықтан мектепте биылдан бастап көшбасшылық пәні оқытыла бастады. Үстіміздегі жылдың қаңтар айынан бастап білім ордасында “TEDx LORD” клубы өз жұмысын бастады. Жобаның басты мақсаты – оқушылардың көшбасшылық қабілеттерін қалыптастырып, пікірлерін ашық жеткізуге дағдыландыру. Клубта оқушылар үш тілде қоғамдық дәрістер тыңдайды. Ғылым, өнер, дизайн, саясат, мәдениет, бизнес, тағы басқа тақырыптар қамтылуда. Клуб мүшелері әр тақырыпты талқылап, “TED” форматында баяндама әзірлейді.
Өткен оқу жылында “Бонус. ЛОРД” рейтингтік жүйесі іске қосылды. Яғни, оқушылардың академиялық, шығармашылық жұмыстарының қорытындысы шығарылып, осыған орай әр сыныптың жетістігі бағаланады. Сынып жетекшілері белсенді балалармен, пән бойынша мұғалімдермен, медициналық қызметкерлермен, психолог маманмен бірлесіп, оқушыларға электронды түрде бонус жүктей алады. Ең көп бонус жинаған оқушыны ынталандыру мақсатында марапаттаймыз. Ал оқу жылының қорытындысында үздік нәтиже көрсеткен сынып “Туған ел” экскурсиясына қатысып, басқа өңірлерге барады.
Гүлжан ЖАҚАНОВА,
дарынды балаларға мамандандырылған “ЛОРД” интернат-лицейінің директоры.
СУРЕТТЕ: мектеп директоры Г.Жақанова оқушылар арасында.