Soltüstık Казахстан
Солтүстік Қазақстан облысында жемқорлық фактілері туралы хабарлағандарға жыл басынан бері 858 мың теңге сыйақы берілді. Облыстық сыбайлас жемқорлыққа қарсы қызметтің мәліметінше, егер кінәлі адамға қатысты әкімшілік жаза қолдану туралы сот қаулысы немесе айыптау үкімі заңды күшіне енген болса, құқық бұзушылық туралы хабарлаған адамға ақшалай сыйақы төленеді.
Қазіргі таңда агенттік халықаралық тәжірибені ескере отырып, сыбайлас жемқорлық фактілері туралы хабарлағандарға сыйақы берудің сараланған жүйесін енгізу мәселесін қарастырып жатыр. Мәселен, пара сомасы 2,5 млн. теңге мен 10 млн. теңге аралығында болса, хабарлаған адамға оның 10 пайызы берілмек.
Облыста тамыз айының соңында екі мемлекеттік қызметші парамен ұсталды. Тимирязев аудандық ауруханасы жұқпалы аурулар бөлімшесі әкімшілік ғимаратын сүруге жол бермеу үшін 200 мың теңге сұрап, соның 100 мыңын алу кезінде ауылдық округ әкімі ұсталды. Сондай-ақ, Шал ақын ауданының ветеринария бөлімінің басшысы да 100 мың теңге пара алғаны үшін қолға түсті. Екі мемлекеттік қызметші де өз кінәларын толығымен мойындады. Тергеу амалдары жүргізілуде.
Ақерке ДӘУРЕНБЕКҚЫЗЫ.