САПАЛЫ ӨНІМГЕ СҰРАНЫС ЖОҒАРЫ

Soltüstık Казахстан

 Kyzylzhar_akparat@mail.ru

Бүгінгі таңда құры­лыс индустриясында заманауи материалдар қолданылып, еңбек адамының жұмысын едәуір жеңілдетуде. Сондай тамаша құрылыс материалдарының бірі – жылу блоктары. Алдағы уақытта тиімділігі жоғары өнім Имантау – Шалқар демалыс аймағында салынатын үйлердің құрылысында қолданылмақ.
Іскер азамат Боштай Жүнісов басқаратын кәсіпорын – зама­науи жылу блоктарын шығара­тын өңіріміздегі жалғыз өндіріс орны. Кәсіпкер бұл өнімді 2014 жылдың тамыз айынан бастап нарыққа шығарған. “Бизнестің жол картасы – 2020” мемлекеттік бағдарламасы аясында “Даму” қорынан демеуқаржы және “Аль­фа банк” акционерлік қоғамының өңірлік филиалынан екі рет 7 миллион теңгеден несие ресім­де­ген. Өндіріске инновация енгізу мақсатында бұл қаражатқа көршілес Ресейден жаңа қондырғылар сатып әкелген. Теңдессіз құрылғы жылу блогын бір минутта құйып шығарады. Ал өнімді дайын тауар қалпына жеткізу үшін, кебу уақытын қоса есептегенде, 7-8 сағат жұм­са­лады.

Кәсіпкердің айтуынша, бүгін­дері өндіріс орны кеңейіп, цех жұмысшылары айына 10 мың дана жылу блогын жасап шығаруда. Тың технологиямен өндірілетін бұл өнім 75-100 жылға дейін шыдайды.
– Тұтынушыларымыз 5 жылдан бері өнімнің сапасы жоғары екеніне көз жеткізуде. Әсіресе, өңірімізге оңтүстік облыстардан қо­ныс аударып, жылу блоктарынан салынған үйлерде тұрып жатқан азаматтар оның артықшы­лы­ғын сезінуде. Қатты соққыларға төзімді құрылыс материалы кірпіш секілді үгітілмейді, оның үстіне бағасы екі есе арзан. Бұл блоктар бiздiң өңiрдiң ауа райына сай, жылуды жақсы ұстайды. Одан салынған үйдiң iшi қақаған аязда – жылы, жазда – салқын. Мәселен, газ блокта­рынан салынған үй жылы болуы үшін сыртын қаптау керек. Сөйтіп, біраз уақыт пен қаржыны шығындауға тура келеді. Ал жылу блогы әжептәуір уақыт үнемдеуге және шығынды азайтуға мүмкіндік береді. Ауданы 100 шаршы метр үйге 800 мың теңгенің ғана жылу блогы қажет, – дейді Боштай Нәбиұлы.
Әр жылу блогы үш қабаттан тұрады. Сапалы жасалған өнім кез келген ауа райына төтеп бере алады. Кәсіпорын басшысының айтуынша, алғашқыда жұрт мұн­дай инновациялық өнімнің тиімділігін біле қоймаған, ал бүгінде оны алушылар қатары қалыңдай түскен. Айта кеткен жөн, бұл өнімге бізден бөлек, Ал­маты, Жезқазған, Щучье қалаларынан және Ресейдің көршілес өңірлерінен сұраныс түсуде.
2014 жылы “Қазақстанның үздік тауары” өңірлік байқау-көрмесінде “Өндірістік мақсаттағы тауарлар” аталымы бойынша ар­найы дипломмен марапатталған кәсіпорынның жұмысы бүгінде қыза түскен. Кәсіпорын 20-дан астам адамды жұмыспен қамтыған. Орташа еңбекақы 100 мың тең­геден асады. Кәсібін өрге домалатқан Боштай Нәбиұлы алдағы уақытта өндіріс аясын әлі де кеңейтуді ойластыруда.
– Бастапқыда қажетті мате­риалдарды Ресейден жеткізетінбіз. Қазір қолданылатын шикі­за­ттың басым бөлігін отандық өнім­дер құрайды. Мәселен, цементті Ресейден, пенопласты Көкшетаудан әкелсек, құм жергілікті Есіл өзенінен алынады. Өкі­нішке қарай, облысымызда мате­риалдардың бағасы қымбат. Имантау – Шалқар демалыс айма­ғында үй салған кезде жылу блок­тарын жасауға қажетті шикізат­тарды Көкшетау өңірінен са­тып алуды көздеп отырмыз, – дей­ді Боштай Нәбиұлы.
“Жүнісов” жеке кәсіпкерлігі 2000 жылы құрылған болатын. Ол осы уақыт ішінде облыс ор­талығында құрылыс саласының дамуына атсалысып келеді. Бүгінде көз жауын алатын кейбір әдемі коттедждердің, дүкен­дердің және қоғамдық-мәдени нысандардың құрылысында аталмыш өндіріс орнының жылу блоктары қолданылғанын біреу білсе, біреу білмес. Атап айтқанда, кәсіпорын шығарған өнім өңірімізде 150-ден астам тұрғын үй құрылысында пайдаланылған. Ақ­қайың ауданының Смирново ауылында екіқабатты Мәдениет үйінің, Тайынша ауданының Ильичевка ауылындағы амбула­торияның қабырғалары да осы материалдан қаланған.

Нұржан СЕЙІЛБЕКОВ,  “Soltústik Qazaqstan”.
Суреттерді түсірген Амангелді БЕКМҰРАТОВ.