Soltüstık Казахстан
Мемлекет басшысы Қасым-Жомарт Тоқаев “Сындарлы қоғамдық диалог – Қазақстанның тұрақтылығы мен өркендеуінің негізі” атты Жолдауында: “2020 жыл “Волонтер жылы” деп жариялады. Еріктілер қызметіне азаматтардың, әсіресе, жастардың, студенттер мен оқушылардың қатысу аясын кеңейту, олардың бойында белсенді өмірлік ұстанымдарға қатысты дағды қалыптастыру – маңызды міндет”, – деген болатын. Өңіріміздің ерікті жастары соңғы жылдары белсенділік танытып, әртүрлі шараларда төбе көрсетіп жүргенін мақтанышпен айтуға болады.
Еріктілердің елге пайдалы жұмыспен өз еркімен әрі еңбекақы талап етпей айналысатыны белгілі. Жастардың қоғамға осылайша септігін тигізуі – мақтауға тұрарлық іс. Облыстық жастар ресурстық орталығының жанынан ашылған еріктілер клубының құрамында қазіргі таңда 250-ден астам студент пен жұмысшы жас бар. Солтүстікқазақстандық еріктілер соңғы үш жылда бірқатар шараның абыроймен өтуіне атсалысты. Мәселен, 2017 жылы елордада халықаралық “ЭКСПО – 2017” көрмесі өтті. Маңызды шараға елдің түкпір-түкпірінен еріктілер жұмылдырылды. Қазақстанды әлемге әйгілеген жаһандық көрмеге қатысу әрбір жастың арманы болғаны сөзсіз. Өңірімізден елордаға жүзден астам ерікті жіберілген еді. Ел мәртебесін бұрынғыдан да биіктете түскен көрмеге қазақ және шет тілдерін білетін жастар ғана іріктелді. Шараға әлемнің көптеген елінен туристер келіп, еріктілерге солармен тіл табысу, оларға бағыт-бағдар беру міндеттері жүктелді. Жалпы, бұл шара еліміздегі еріктілер қозғалысының дамуына жаңа серпін берді.
Ерікті болу – үлкен тәжірибе. Былтыр өңір еріктілері Петропавл қаласында Қазақстан мен Ресейдің XV өңіраралық ынтымақтастық форумының өтуіне көмектесті. Президенттердің қатысуымен өткен шара қонақтарын қарсы алуға 200-ден астам ерікті жұмылдырылды. Сондай-ақ, Алматыда ұйымдастырылған қысқы Универсиада, Петропавл қаласында өткен “Дельфий” ойындарында және футболдан “Er Janibek cup” халықаралық турнирінде тәжірибе жинақтаған еріктілер де бар. Бұл шараларда ағылшын, түрік және француз тілдерін жетік меңгерген жерлестеріміз өздерінің көмегін аямады.
Бүгіндері қалалық, облыстық, республикалық деңгейдегі шаралардың өтуін еріктілерсіз елестету қиын. Өйткені, олар өз міндеттерін атқаруда жауапсыздық танытса, шараның тиісті дәрежеде өтуі екіталай. Биыл маусым айының соңында өңіріміздің еріктілер тобы Бурабайда өткен республикалық жас мемлекеттік қызметшілердің форумына қатысты. Оларға жан-жақтан келген делегаттарға жайлы жағдай жасау жүктелді. Ал тамыз айының соңында бізге “Jаstаr kerýenі” республикалық жобасына қатысу бақыты бұйырды. Шараға еліміздің әр өңірінен 900-ге жуық жас қатысса, өңірімізден 30 ерікті таңдалды. Біз үшін еліміздің киелі жерлерімен танысуға мүмкіндік туды. Осылайша, Алматы облысының киелі жерлерін аралап, Шарын шатқалына және Төменгі Көлсай көлінің жағасына барып, көркем табиғатта демалдық.
Мен еріктілердің қатарына қосылғаныма қуаныштымын. Үздік болу үшін жан-жақты жетілу үстіндемін. Мәселен, адамдармен тез тіл табыса алу, сабырлылық, жауапкершілік, көшбасшылық, кішіпейілділік сияқты асыл қасиеттерді бойыма сіңірдім. Көптеген ізгі ниетті адамдармен таныстым. Ал “Волонтер жылында” мүмкіндіктердің көкжиегі кеңейе түсері сөзсіз.
Евгений СОЛОВЬЕВ, ерікті.