Soltüstık Казахстан
Елімізде мемлекеттік қызметтің барлық деңгейіне жас басқарушыларды тарту үшін Президенттік жастар кадрлық резерві қалыптастырылмақ. 1 қыркүйек күні резервке үміткерлердің өтінішін қабылдау үшін “PKRezerv.kz” арнайы сайты жұмысын бастады.
Комиссия мүшелерінің айтуынша, резервке кемінде 5 жыл жұмыс өтілі бар, 35 жасқа толмаған Қазақстан Республикасының жоғары білімді азаматы үміткер бола алады. Өтініш білдірушінің елде болуы шарт емес. Яғни, шетелдегі жастарымыздың да бағын сынауға мүмкіндігі бар.
Бірнеше кезеңнен тұратын іріктеуде үміткерлер алдымен тест тапсырып, эссе жазады. Бұл қатысушылардың ой-өрісін, жазу қабілетін, ақпаратты сараптай алуы мен жеке қасиеттерін бағалауға мүмкіндік береді. Алғашқы кезеңнен сүрінбей өткендер бейнежазбалар арқылы өз жобаларын қорғайды. Жобалардың әлеуметтік маңызы болуы шарт. Әр кезеңнің бағасы есепке алынып, үміткерге орташа ұпай қойылады. Озып шыққандармен эксперттік комиссия жеке кездесу өткізеді. Ең көп ұпай жинаған қатысушылардың кандидатурасы Президенттің жастар кадрлық резерві Ұлттық комиссиясының отырысында белгілі болады.
– Президенттік жастар кадрлық резерві – жастар үшін тиімді әрі ашық әлеуметтік саты құруға мүмкіндік береді. Жас азаматтарға зор үміт артылып отыр. Олар алдағы реформалардың қозғаушы күші болуы керек. Президенттік жастар кадрлық резервіне іріктеу ережесі мен тәртібі Президент Жарлығымен реттеледі”, – дейді Мемлекеттік қызмет істері агенттігінің төрайымы Анар Жайылғанова.
Конкурстың негізгі кезеңдері биылғы қазанда өтеді. Алғашқы тестілеу 12 қазанға белгіленген. Әр кезең тапсырмасының орындалу уақыты шектеулі. Жеке сұхбаттар қарашаның соңына жоспарланған. Ал Ұлттық комиссияның отырысы 25 желтоқсанда өтеді. Яғни, үздік жастар 2020 жылдан бастап жаңа қызметтеріне кірісе алмақ.
Президенттік жастар кадрлық резервін іріктеудің ақпараттық жүйесін жасаушы Дана Жақыпова үміткерлердің тізімі мен олар туралы ақпарат барлығына ашық болатынын айтты. Тіпті, азаматтарымыздың қатысушы туралы пікір қалдыруға да мүмкіндігі болады.
Мұхтар ХАҚНАЗАР.