ТАЛАБЫ ТАУДАЙ

Soltüstık Казахстан

 Kyzylzhar_akparat@mail.ru

Домбыраның үніне селт етпейтін қазақ жоқ-ау, сірә. Оның қоңыр сазы сан құбылып, қос шекті ас­пап бірде қатты, бірде баяу шертілді. Құрманғазының “Адай” күйін тыңдарманның жүрегіне жет­кізе алған Әлішер Жігеров сын­ды жас күйшінің өнеріне қа­лайша риза болмайсың?!

Атадан балаға мирас болған асыл өнерді ардақтап, күй құді­ретін ұғынған Әлішердің домбы­рада ойнау шеберлігі таңдай қақ­тырды. Айыртаудың атырабында Ақан сері, Үкілі Ыбырай, Орын­бай ақынның ізін жалғаған да­рындар аз емес. Солардың қата­ры­нан көрінуге талпынған Әлі­шер­ден үлкен үміт күтуге болады. Баланың бойынан өнерді, қарым-қабілетті байқаған атасы немере­сін өнерге баулыды. Алысқа ша­батын тұлпарға бап керек емес пе? Жігер марқұм Әлішерді Сау­малкөлдегі музыка мектебіне өзі жетектеп апарып, батасын берді.
– Әу демейтін қазақ жоқ. Атам, әке-шешем өнерге жақын. Наға­шы­ларым да домбыраның құла­ғын­да ойнайды. Менің де таң­дауым өнер болды. Кішкентай ке­зімде домбыраны қолыма ұстат­қан атамның өсиетін естен шы­ғарған емеспін, – деген Әлішердің өнерге деген сүйіспеншілігі ерек­ше екенін аңғардық. Өнер дейтін өмір өрнегінің қыр-сырын ұғын­дырып, оның шығармашылығын шыңдауға үлес қосқан Анар Ес­мағамқызы мен Нұрғиса Құр­метбек сияқты ұстаздардың ең­бегін де ерекше атап өткен жөн. Киелі аспапқа деген құлшынысын оятқан тәлім­герлеріне жас дарынның айтар алғысы шексіз.
Бүгінде ол үміт артқан ұстаз­дары­ның сенімін ақтап, талай бә­секелерде жүлделі орындарға ие болуда. “Болар бала бесігінде бұл­қынады” демекші, мектепте оқып жүргенде-ақ, байқауларға қа­тысып, топ жарды.
Үнемі шығармашылығын шың­дап, тың ізденіс үстінде жүретін Әлі­шер білімін жетілдіріп, өнер­дің биігін бағындыру үшін алға ұмтылды. Бүгінде ол Қызылжар­дағы өнер колледжінде білім алуда.
– Кез келген байқау, әсіресе, рес­публикалық, халықаралық өнер додалары қызу дайындық­ты қажет етеді. Өткен жылы жас орындаушылардың VI республи­калық байқауына қатысып, өңір атын асқақтатуға барынша күш сал­дым, – дейді Әлішер.
Құрманғазыдай атақты күйші болуды армандайтын жас дарын еліміздің даңқын әлемдік сахна­ларда асқақтатуды алдына мақ­сат еткенін айтты. “Батыр болар баланың бетінен қақпа, белін бу!” демекші, осындай дарынды жас­тарға қолдау білдірсек, нұр үстіне нұр болар еді.

Ақмарал ЕСДӘУЛЕТОВА, “Soltústik Qazaqstan”.