Soltüstık Казахстан
Жазда М.Қозыбаев атындағы Солтүстік Қазақстан мемлекеттік университетінің белсенді студенттері – Нұрсейіт Әбдіразақов пен Роман Гиричев Арктикадағы Велькинский аралына экспедицияға барып, ол жерді қоқыстан тазартуға атсалысты. Студенттер жақында сапарға алып барған білім ошағының жалауы мен естелік суреттерін университеттің мұражайына табыстады.
Ресей Федерациясының Салехард қаласындағы “Жасыл Арктика” экологиялық ұйымының жергілікті университетпен әріптестік қарым-қатынас орнатқанына биыл үшінші жыл. Ынтымақтастық аясында ұйымдастырылған экологиялық экспедицияға солтүстікқазақстандық студенттер белсенді қатысуда.
– Университетімізге Ямал-Ненец автономиялық округінің өкілдері келген болатын. Кездесу аясында экспедиция жайлы толық ақпарат беріп, еріктілерді Арктикаға шақырды. Біз көп ойланбастан келістік. Сөйтіп, онда “Серпін – 2050” бағдарламасы аясында оқитын Қасымхан Сапа мен Дүйсебек Сапарбай аттанған еді. Бұл жолы да шарадан тыс қалмауға тырыстық, – деді М.Қозыбаев атындағы СҚМУ-дің математика және жаратылыстану ғылымдары факультетінің деканы Сергей Пашков.
География мамандығы бойынша білім алып жүрген Нұрсейіт Әбдіразақов пен Роман Гиричев Ресейден, Молдовадан және Израильден жиналған өздері секілді жастармен бірге бір айдың ішінде 100 килограмнан астам күл-қоқыс жинады. Осылайша, жерлестеріміз қоршаған ортаны тазартуға өзіндік үлестерін қосқан. “Кар теңізінде орналасқан арал Ямал-Ненец автономиялық округінің солтүстігі болып есептеледі. Кезінде әскери база мен метеорологиялық станса орналасқан аралға мыңдаған тонна темір қалдықтары тасталып, қоршаған орта айтарлықтай зардап шеккен екен. Осыдан бірнеше жыл бұрын орыс географиялық қоғамы қолға алған жобаның арқасында экологияны қорғау шаралары жүйелі түрде өткізіліп келеді. Күннің суықтығына, ылғалдылықтың жоғарылығына қарамастан, саяхаттан керемет әсер алып қайттық”, – деді студенттер.
Нұржан СЕЙІЛБЕКОВ, “Soltústik Qazaqstan”.