Soltüstık Казахстан
Жуырда өңірімізге Мәскеу қаласынан білікті инженер, Александр Прохоров атындағы инженерлік ғылымдар академиясының корреспондент-мүшесі Юрий Мещеряков келді. Ол облыс орталығындағы “Изолит” жауапкершілігі шектеулі серіктестігінің жұмысшыларымен өз тәжірибесімен бөлісті.
“Изолит” ЖШС-і – теміржол, энергетика салаларында кеңінен пайдаланылатын жоғары сапалы электроқшаулағыш материалдар өндіретін кәсіпорын. Зауытта жылына 400 млн. теңгенің өнімі шығарылады. Жергілікті зауыттың сапалы тауарлары елімізде ғана сатылып қоймай, Беларусь, Украина және Ресейге экспортталады. Кәсіпорын шығарылатын өнім көкжиегін кеңейтуді көздеп отыр. Мәскеулік инженер екі апта бойы технологиялық үдерісті жақсарту бойынша өзінің тәжірибесімен бөлісті.
– Мен кәсіпорын жұмысшыларына “Аргоф-ЭП” атты электр оқшаулағыш эмаль өндіруді үйреттім. Сапалы әрі экологиялық таза өнімді атом-электр станцияларында, флот өндірісінде қолдануға болады. Алдағы уақытта серіктестік басшылығы Ресейдің Новосібір қаласынан тапсырыспен арнайы қондырғы алдыртпақ. Қазір кәсіпорында 100-ден астам адам жұмыс істейді екен. Олардың барлығы да тәжірибелі, – деді Юрий Мещеряков.
Облыстық кәсіпкерлер палатасының сарапшысы Әсел Самаратованың айтуынша, “Атамекен” Ұлттық кәсіпкерлер палатасының жобасы аясында жыл сайын облысымызға 4-5 шетелдік маман келеді. Олар жергілікті кәсіпкерлерге кәсіпорынды басқарудың жаңа әдістерін, заманауи өндіріс технологиясын, жабдықтарды қолданысқа енгізуді үйретеді. Мәселен, өткен жылы өңірімізге Түркиядан білікті кондитерлер келді. Жыл соңына дейін өңіріміздің үш кәсіпорнына шетелден кеңесші-мамандар келеді деп күтілуде.
Гүлмира ШОҚТЫБАЕВА,
облыстық кәсіпкерлер палатасының баспасөз хатшысы.