Soltüstık Казахстан
Тамыз айында Грекияның астанасы Афина қаласында “Кітапханалар: өзгерістерге арналған диалог” атты кітапханашылардың дүниежүзілік конгресі өткен болатын. Оған 140 елден үш мыңнан астам делегат қатысты. Қазақстандық делегация құрамына енген біздің өңірдің кітапханашылары әлемнің түпкір-түпкірінен келген әріптестерінің алдында озық тәжірибелерімен бөлісіп, осы салаға қатысты ой-пікірлерін ортаға салды.
Үстіміздегі жылы ұйымдастырылған “Рухани қазына – 2019” республикалық фестивалінің облыстық турында Уәлиханов аудандық орталық кітапханасы аудандар бойынша топ жарып, Нұр-Сұлтан қаласында өткен ақтық сында Грекияға аттанатын делегацияның құрамына енген болатын. Афинада өткен конгреске Сәбит Мұқанов атындағы облыстық ғылыми-әмбебап кітапхананың директоры Бейбіткүл Әбілмәжіновамен бірге Уәлиханов аудандық кітапханасының директоры, аудандық мәслихаттың депутаты Күләш Егімбаева да барып қайтты. Жерлестеріміз конгресс барысында кітапхана ісін жаңғырту, ақпараттық және инновациялық басқару саласындағы озық тәжірибелермен бөлісу тақырыбында ұйымдастырылған отырыстарға белсене қатысты.
Жиын барысында әлемнің түкпір-түкпірінен келген кітапханашылар озық идеяларымен алмасып, мейлінше жоғары сапалы қызмет көрсету жолдарын анықтап, кітапханалардың алдында тұрған өзекті мәселелерді талқылады. Сонымен қатар мұнда аймақтық және халықаралық деңгейдегі кітапхана ісін жаңғырту, заман талабына сай жаңаша ойлауды қалыптастыру және кітапхананың жаңа бет-бейнесін қалыптастыру мәселесі де қозғалды.
Халықаралық деңгейдегі ауқымды шара аясында Абай Құнанбайұлын әлемдік өркениет ауқымында таныстыру мақсатында “Ұлы даланың ұлы ақыны – Абай” атты әдеби кеш ұйымдастырылды. Сондай-ақ “Арал аймағының экологиялық ортасын қайта жаңғырту жөніндегі кітапханалық еріктілер қызметі” туралы Ұлттық кітапхана мамандары мен солтүстікқазақстандық кітапханашылар бірігіп дайындаған баяндама ағылшын тілінде Дүниежүзі кітапханашыларының назарына ұсынылды.