Soltüstık Казахстан
Сәбит Мұқанов атындағы облыстық ғылыми-әмбебап кітапханада Қазақстан халқы тілдерінің XXI фестивалі аясында “Ілеспе аударманы оқыту, тіл мәдениетін жетілдіру” атты кеңес өтті.
Тіл білімі мамандары мен аудармашылардың басын қосқан ауқымды шараға белгілі аудармашы, филология ғылымдарының кандидаты, Қазақстан Республикасы Президентінің жанындағы қоғамдық келісім мекемесінің қызметкері Камал Әлпейісова қатысты. Кеңес барысында ол қатысушыларға аудармашылардың біліктілігін арттыру, ілеспе аударманы дамыту мәселелері бойынша дәріс оқыды. Нұр-Сұлтан қаласынан келген Камал Әбілқасымқызы елімізде ілеспе аударма жасауды меңгерген алғашқы маман екенін айтып өткен жөн. Ілеспе аударманың әдістемесін жасап, ғылыми диссертация қорғаған ғалым ілеспе аударма жасау елімізде кештеу қолға алынса да, қазір жақсы дамып келе жатқанын айтты.
Кеңесте облыстық тілдерді дамыту жөніндегі басқарманың мамандары мекемелерде мемлекеттік тілде іс жүргізуді жетілдіру, тілдерді оқыту үшін қажетті материалдық базаны нығайту жұмыстары қолға алынғанын, облыстық және аудандық әкімдіктердің мәжіліс залдары ілеспе аударма қондырғыларымен жабдықталғанын жеткізді. Мамандардың айтуына қарағанда, түрлі деңгейде өтетін жиындарда ілеспе аударма жасау тіл тазалығы мен сауаттылықты қажет етеді.
– Қожаберген, Мағжан, Ғабит, Сәбит сияқты қазақтың марғасқа ұлдарын дүниеге әкелген қасиетті Қызылжар өңірінде болу арманым еді. Осы кеңестің арқасында сіздермен қауышып, арманыма қол жеткіздім. Тіл білімі саласының деңгейін көтеру үшін мұндағы әріптестеріммен тығыз байланыс орнату маңызды. Мемлекеттік тілді ұлтаралық қатынас тіліне айналдыру үшін сіздер мен біздерге түсетін жұмыстың салмағы ауыр, – дей келе Камал Әбілқасымқызы әлемде ілеспе аударманың әдістемесі көп екенін жеткізді. Екі күндік кеңес барысында білікті маман қатысушыларға ілеспе аударманың бастапқы дағдыларын үйретпек.