БОТАЙ – ҚЫЛҚАЛАМ ШЕБЕРЛЕРІНІҢ КӨЗІМЕН

Soltüstık Казахстан

 Kyzylzhar_akparat@mail.ru

Айыртау ауданында “Botaı – Uly dalanyń mádenıeti” атты суретшілердің халықаралық симпозиумы өтті. Екі күнге созылған шараға Қырғызстан, Ресей, Өзбекстан мемлекеттерінен және еліміздің бірнеше өңірінен 19 суретші жиналды.
Елбасы Нұрсұлтан Назарбаев “Ұлы даланың жеті қыры” атты бағдарламалық мақаласында “Ботай” қонысында жүргізілген қазба жұмыстарының нәтиже­сінде жылқының тұңғыш рет қа­зіргі Қазақстан аумағында қолға үйретілгені дәлелденіп, осы ар­қылы біздің бабаларымыз өз дә­уірінде адам айтқысыз үстемдікке ие болғандығы, атқа міну мә­дениетінің негізі біздің жерімізде қаланғаны жайлы айтқан еді. Ботай тұрағына бүгінде шетелдік туристердің қызығушылығы ар­тып отыр. Сондықтан суретшілер симпозиумы осы құнды мәдениетімізді әлемнің басқа елдеріне таныту мақсатында өтуде.

Қазақстан Суретшілер одағының қолдауымен ұйымдас­тырылған шараға ЮНЕСКО жа­нындағы Халықаралық көркем-өнер қауымдастығының мүшесі, өнертанушы, мәдениеттанушы Камилла Ли арнайы келіпті. Ол тарихи орыннан алған әсерін қа­ғаз бетіне түсіруде. Алдағы уақытта бұл жазбалар топтастырылып, каталог болып басып шы­ғарылмақ.
Қазақстан Суретшілер одағы­ның мүшесі Болат Серікбековтің айтуынша, халықаралық деңгейде елімізде бірінші рет ұйымдас­тырылып отырған шара мәдениет пен өнердің дамуына үлес қоса отырып, шығармашылық ынтымақ­тастық пен достық қарым-қатынасты дамытуға, мәдени бай­ла­ныс орнатуға, өнер тұлғалары­мен тәжірибе алмасуға, бейнелеу өне­рін насихаттауға септігін тигі­зері сөзсіз. Өйткені, “Ботай” му­зей-қорығы болашақта еліміздің асыл қазыналарының біріне ай­на­лады. “Ботай қонысы – біз үшін киелі орын. Көптеген елдер қы­зығушылық танытып отыр. Симпозиум барысында суретшілер өңірдің әсем табиғатынан алған әсерлерін өз туындыларына арқау етеді”, – деді Болат Серікбеков.
Өңіріміздің әсем табиғаты қылқалам шеберлеріне шабыт бергені бірден сезілді. Бірі қылқаламын алып, Ботай қонысында жүргізілген қазба жұ­мыстарының жанында отырса, енді біреулері самсаған қалың ағаштарды бейнелеуге тырысуда. Сурет­шілердің бір бөлігі сол маңдағы лагерьде жиналып, табиғаттан ал­ған әсерлерін қылқаламның кө­мегімен, сан түрлі бояудың құді­ретімен өрнектеді.
Солардың ішінде Ресей Феде­рациясының Кабардино-Балка­рия өңірінен келген Шамиль Гулиевтің шығармаларына көпші­ліктің назары ауды. Қылқалам шебері біраз жылдар Алматы қаласында тұрған. Шығарма­шы­лық өмірінің басым бөлігін гра­фикаға арнаған суретші он жыл бұрын мүсінге бет бұрып, көркем суретке ден қойды. Суретшінің осы уақыт аралығында бірнеше рет жеке көрмесі өткен. Соның ішінде 2008 жылы Лондондағы “Christie’s” аукцион үйіне қойыл­ған Қазақстанның заманауи өнер көрмесі де бар. Оның жұмыстары бүгінде танымал басылымдарда жарияланып жүр.
– Мен суреттерімде кез келген көріністің табиғи бей­не­сін көрсетуді көздеймін. Бұл өңірді біз жылқыны тұңғыш қолға үйреткен жер ретінде танимыз. Жергілікті тұрғындар да жылы­жүзді, қонақжай екен, – деді Ша­миль Гулиев.
Ал өзбекстандық Алишер Ха­ми­дов осыған дейін Ресейдің Мәс­кеу, Қазақстандағы Алматы, Қа­рағанды қалаларында болып, шы­ғармашылық көрмелерге қатыс­қан екен. Осы жолы өзінің жұмыс­тарында жазық даланы, қалың орманды бейнелеуге тырысқан.
Қылқалам шеберлері туындыларын естелікке қалдырмақшы. Олар қыркүйек айының соңында облыстық тарихи-өлкетану мұра­жайында өтетін көрмеге қойы­лады.

Орынбасар ТӨЛЕПБЕРГЕНҚЫЗЫ, “Soltústik Qazaqstan”.
Суретті түсірген  Талғат ТӘНІБАЕВ.