Soltüstık Казахстан
Демалыс күндері заманауи “Dostyk mall” сауда-ойын-сауық кешенінің салтанатты түрде ашылуына жиналған қауымның қарасы қалың болды.
Бұл жобаны жергілікті кәсіпкер Мұхтар Игібаев мемлекеттің қолдауымен жүзеге асырды. Құрылыс жұмыстарына 5,5 млрд. теңге ақша жұмсалған төрт қабатты сауда-ойын-сауық орталығының ауданы 30 мың шаршы метрді құрайды. Демалыс орнына күніне 15 мыңға жуық адам келіп, өзіне қажетті қызметтерді ала алады. Бұл жерден отандық өнімдермен қатар, халықаралық компаниялардың тауарларын да табуға болады. Бес залдан тұратын заманауи кинотеатр, балаларға арналған ойын-сауық алаңы, дәмханалар мен мейрамханалар да тұрғындардың игілігіне берілді. Ал автотұрақ 400 көлікке шақталған.
Салтанатты шарада сөз алған облыс әкімі Құмар Ақсақалов жергілікті тұрғындарды жаңа демалыс орнының ашылуымен құттықтады.
– Ескі үйлер сүріліп, орнына заманауи баспаналар мен нысандар бой көтеруде. Бұл жердегі ескі ғимараттың орнына ерекше сәулеті бар заманауи кешен тұрғызылды. Қаламызға көрік берген сауда-ойын-сауық кешенінің әлеуметтік маңызын да айтып кетпеске болмас. Сауда орталығында 400 солтүстікқазақстандық жұмыспен қамтылмақ. Қала тұрғындары мен қонақтарына көптеген қызмет түрі ұсынылып, олар бұл жерде демалуға мүмкіндік алады, – деді Құмар Іргебайұлы. Одан кейін облыс әкімі сауда орталығын аралап, жоғары бағасын берді.
Жаңа нысан алдағы уақытта, әсіресе, жастардың сүйікті орнына айналары сөзсіз. Ашылу салтанатында жастардың атынан “Qyzyljar” телеарнасының редакторы Индира Баймұхамбет сөз алды.
Сауда орталығын аралауға келген тұрғындардың қарасы күні бойы азаймады. Ашылуына орай ұйымдастырылған шоу мен концерттік бағдарлама екі күнге жалғасты. Онда ән-бимен қатар балаларға арналған анимациялық, көңіл көтеру бағдарламалары да әзірленіпті. Келесі күні Жұмабаев көшесінің бойында, сауда орталығының алдында сыйлықтар ойнатылды. Жеңімпаздарға теледидар, “Iphone”, ноутбук, тағы басқа бағалы сыйлықтар табысталды. Сонымен қатар көпшілік сүйіп тыңдайтын “Серебро” тобының әншісі Ольга Серябкина арнайы келіп, жергілікті тұрғындар алдында өнер көрсетті.