Нұротандықтарды құттықтады

Soltüstık Казахстан

 Kyzylzhar_akparat@mail.ru

Сағат 00:00-де exit-poll нәтижелері жарияланған соң Қазақстанның Тұңғыш Президенті Нұрсұлтан Назарбаев «Nur Otan» партиясының республикалық сайлауалды штабына барды, деп хабарлады Елбасының баспасөз қызметі.

Бірінші кезекте айта кетейік, exit-poll қорытындысына сәйкес «Nur Otan» партиясы сайлаушылардың 71,97 пайыз дауысын жинады.
– Баршаңызды «Nur Otan» пар­тиясының айқын жеңісімен құт­тық­таймын. Exit-poll-дың алдын ала нәтижелері қазақстандықтар еліміздің әрі қарай дамуын біздің партиямызбен байланыстыратынын көрсетті. Сайлаудың ел Тәуелсіздігінің 30 жыл­дығымен тұспа-тұс келуінің сим­волдық мәні бар. Осы уақытта орасан зор жұмыс атқарылды. Ең бас­тысы – жаңа ауқымды мақсаттарға қол жеткізу үшін берік негіз қаланды, – деді Елбасы.
«Nur Otan» партиясының Төрағасы сайлауалды үгіт-насихат науқаны мен сайлау пандемия және соның салдарынан туындаған экономикалық дағдарыс жағдайында өткенін айтты.
– Әлемде коронавирус інде­тіне шалдыққандар саны артуда. Дү­ниежүзілік банк әлемдік эконо­мика құлдырап, жұмыс­сыздық өседі деп болжап отыр. Бұл жағдайда бір­тұтас саяси күштің айналасына топтасқан қоғам ғана жеңіске жетеді, – деді Қазақстанның Тұңғыш Пре­зи­денті.
Нұрсұлтан Назарбаев бүгінгі жетістік жұмыла атқарылған жұмыс пен партияның әрбір мүшесінің еселі еңбегінің нәтижесі екенін атап өтті.
– Баршаңызға атқарылған жұмыс үшін ризашылығымды білдіремін және тек жақсылық тілеймін. Науқан тиімді әрі нәтижелі өтті. Партия қатары жаңарды. Халық арасында беделі биік жаңа көшбасшыларымыз бар. Әр ауданның, қаланың, облыстың дамуы үшін халықтық бағдарламалар әзірленді, – деді партия Төрағасы.
Елбасы «Nur Otan» партиясының сайлауалды бағдарламасы Бес инсти­ту­ционалдық реформаның, соның ішінде Мемлекет басшысының халыққа Жол­дауында берген тапсырмаларының жал­ғасы екенін айтты.
– «Nur Otan» партиясының басты мақсаты – халықтың тұрмысын жақ­сарту және елдігімізді нығайта беру. Ел болып біріге білсек, алынбайтын асу жоқ. Басымызға түскен қиын­дық­тарды біз әрдайым бірге еңсеріп, жетіс­тіктерге бірлесе жетеміз. Бар­шаңызды партиямыздың бүгінгі жеңісімен құттықтаймын, – деді Елбасы.
 

 https://egemen.kz