ҚЫСҚЫ ЖОЛ ҚАУІПТІ

Soltüstık Казахстан

 Kyzylzhar_akparat@mail.ru

Қызылжар өңірінің қытымыр қысы сақтықты талап етеді. Қауіпсіздік ережелерін сақтамасаң, үскірік аяздан, көктайғақ пен дауылдан зардап шегуің әбден мүмкін. Төтенше оқиғаларға қашанда дайын болсаңыз, кез келген қиындық еңсеріледі. Өкінішке қарай, сақтық талаптарын жұрттың барлығы бірдей ескере бермейді. Сондықтан жақын және алыс жолдарға шығатындар қауіпсіздік шараларын естен шығармағаны абзал.

Ең алдымен, синоптиктердің бол­жамдарын ескеріп, күннің ра­йын бақылап, жол қауіпті көрінсе, сапарды кейінге қалдырған абзал. Алыс сапарға шығуға жағдай мәж­бүрлеп тұрса, көлігіңіздің техника­лық жарамдылығына әбден көз жет­кізіңіз. Екіншіден, қай жаққа, не­мен және қашан шығып жететіні­ңіз туралы жақындарыңыз хабар­дар болсын. Оқыс оқиға жағ­да­йын­да сізді іздеу және құтқару ша­ралары қабылданатыны сөзсіз. Он­дайда байланыс құралы қолы­ңыз­да болса, құба-құп. Үшін­ші­ден, жылы киініп, ыстық шай не­ме­се кофе құйылған термосты, бір­неше майшамды, медицина­лық қобдишаны өзіңізбен бірге ала жүргеніңіз дұрыс.

Боранда жолда қалуға мәжбүр болсаңыз, көлікті желдің ығына орналастыруға тырысыңыз. Жа­нармайды үнемдеу үшін оны көп жағып қоймай, салонның ауасын әлсін-әлсін жылытыңыз. Ең бас­ты­сы, газ шығаратын түтіктің бекі­тіліп қалмағанын тексеріп алы­ңыз. Сонымен қатар іздеушілер­дің немесе жол-жөнекей адам­дар­дың көз қырына тез ілігу үшін көліктің жоғары жағына түрлі түсті мата байлап (ұзын таяқша, антен­на) қойыңыз. Көлікті қар жауып қал­са, қозғалтқышты қоспаңыз, мотор жұмыс істеген кезде түтін­нің салонға кіруі ықтимал. Елді ме­кеннің қай жақта орналасқанын, оның алыс-жақынын білмесеңіз жаяу жолға шығудың қажеті жоқ. Оны тек басқа амал қалмаған жағдайда ғана ойластырыңыз. Ол үшін бар киіммен қымтанып алған жөн. Байланыс құралдары неме­се жолда кетіп бара жатқан жолау­шылар арқылы төтенше жағдайға немесе жол полициясына хабар беру керек. Құтқарушылардың “112” телефон нөмірі тәулік бойы жұ­мыс істейді, сіздің қоңырауы­ңыз ескерусіз қалмайды.

Жоғарыда айтылған қауіпсіздік ережелерін сақтау қиын емес. Оларды сақтай отырып, өзіңіздің және қасыңыздағылардың өмірі мен денсаулығына төнетін қауіп­терді азайта аласыз.

Дамир АЙТБАЕВ,

Айыртау аудандық төтенше жағдайлар бөлімінің инженері.