Soltüstık Казахстан
Қызылжар жұртшылығы жиі бас сұғатын руханият ошағы – Николай Погодин атындағы облыстық орыс драма театрына күрделі жөндеу жүргізілді. Адам танымастай өзгерген мәдениет ордасын өңір басшысы Құмар Ақсақалов пен қоғам белсенділері аралап қайтты.
Іргетасы 1972 жылы қаланған театр ғимаратына соңғы рет жөндеу жұмыстары 2000 жылдардың басында жүргізілген. Шілде айында бастау алған жөндеу жұмыстарына республикалық және жергілікті бюджеттен 250 млн. теңге қаржы бөлінген. Жоба жетекшісі Болат Әсербековтің айтуынша, 60-тан астам құрылыс маманы театр ғимаратының қасбетін, сахнасын, көрермендер залын жөндеді. Жаңа жарық шамдары орнатылып, инженерлік желілер ауыстырылды.
– Өткен жылы пандемияға байланысты театрлардың жұмысына шектеу қойылды. Бірақ біз сол уақытты тиімді пайдаланып, көрермендердің эстетикалық-рухани ләззат алуы үшін мәдениет ошағына күрделі жөндеу жүргізуді бастадық. Енді, міне, көздеген мақсатқа қол жеткізіп отырмыз. Жалпы, былтыр мәдениет нысандарын жөндеуге бөлінетін қаражатты 40 пайызға көбейтіп, облыс бойынша 32 ғимаратты күрделі жөндеуден өткіздік, – деді Құмар Іргебайұлы
Нұржан СЕЙІЛБЕКОВ,
“Soltústik Qazaqstan”.