Soltüstık Казахстан
Қазақстан Республикасының Премьер-Министрі Асқар Мамин жұмыс сапарымен Солтүстік Қазақстан облысына барды. Жұмыс сапары аясында инвестициялық жобалардың іске асырылуын тексеріп, өңірдің әлеуметтік-экономикалық дамуы жөнінде кеңес өткізді. Үкімет басшысы алдымен Петропавл қаласындағы «Qyzyljar» арнайы экономикалық аймағы аумағында ашылатын электр техникалық өнімін өндіретін жаңа зауыттың құрылыс барысымен танысты. Жоба құны – 10 млрд. теңге. Кәсіпорынның қуаттылығы 300 жаңа жұмыс орнын құрып, жылына 13 мың трансформатор шығаруға жетеді.
Асқар Мамин «Петропавл ауыр машина жасау зауытына» барды, оның аумағында тез бұзылатын азық-түлік өнімдерін тасымалдауға арналған термос вагондарды құрастыратын жаңа өндіріс орны ашылған. Жобалық қуаттылығы – 200 адамды жұмыспен қамти отырып, жылына 1200 вагон шығару. Премьер-Министр «Солтүстік фанера комбинаты» ЖШС-нің ламинатталған фанера өндіретін зауытының жұмысымен танысты. Кәсіпорын 150 адамды жұмыспен қамтып отыр. Жобалық қуаттылығы – жылына 27 мың текше метр өнім.
Сондай-ақ Үкімет басшысы Петропавл қаласының «Шығыс» шағын ауданында JCI халықаралық стандарттары бойынша 510 орнына арналған көпбейінді облыстық аурухана құрылысының барысын тексерді. Жобаны 2022 жылдың соңына қарай мемлекеттік-жекемешелік әріптестік аясында «YDA Holding» түрік инвесторы жүзеге асырады. Қызылжар ауданының Чапаево ауылында Премьер-Министр «Қызылжар сүт» ЖШС-нің жаңа цифрландырылған сүт-тауар фермасында болды. Ферманың қуаттылығы – жылына 3,6 мың тонна сүт өнімін шығару.
Жұмыс сапарының қорытындысы бойынша Премьер-Министр Солтүстік Қазақстан облысының әлеуметтік-экономикалық дамуы және алдағы кезеңге арналған перспективалары жөнінде кеңес өткізді. Облыс әкімі Құмар Ақсақалов, ауыл шаруашылығы министрі Сапархан Омаров, индустрия және инфрақұрылымдық даму министрі Бейбіт Атамқұлов, денсаулық сақтау министрі Алексей Цой, еңбек және халықты әлеуметтік қорғау министрі Серік Шәпкенов, білім және ғылым министрі Асхат Аймағамбетов, ұлттық экономика вице-министрі Ермек Алпысов және қаржы бірінші вице-министрі Берік Шолпанқұлов баяндама жасады.
– Солтүстік Қазақстан облысы агроөнеркәсіптік кешенде, өңдеу өнеркәсібінде және басқа да салаларда үлкен әлеуетке ие. Өңірдің одан әрі әлеуметтік-экономикалық дамуына, оның бәсекеге қабілеттілігін арттыруға, халықтың тұрмыс сапасы мен әл-ауқатының жоғары болуын қамтамасыз етуге елеулі серпін беру қажет, – деді Асқар Мамин.
2020 жылдың қорытындысы бойынша Солтүстік Қазақстан облысының ауыл шаруашылығындағы жалпы өнім көлемі 779 млрд теңгені құрады, бұл өткен жылғыдан 27 пайызға жоғары, өнеркәсіптік өнім өндіру көлемі – 306 млрд теңге (4,8 пайызға көп). Негізгі капиталға салынған инвестициялар көлемі 20,5 пайызға немесе 281 млрд теңгеге дейін ұлғайды.
«Рrimeminister.kz».