Soltüstık Казахстан
Әбу Досмұхамбетов атындағы облыстық дарынды балаларға мамандандырылған гимназия-интернатының 9-сынып оқушысы Ғалия Қожаева қазақ тілі мен әдебиеті пәндері бойынша қорытынды емтиханның талаптары мен шарттарын түсіндіріп беруді өтініпті. Сауалға білім саласындағы әдістемелік жұмыс және ақпараттық технологиялар орталығының әдіскері Әсел Есімсейітова жауап береді.
– 9-сыныптар бойынша қазақ тілі мен әдебиеті пәндерінен тапсырмаларды құрастыру және сараптау тақырыбында арнайы онлайн-семинар өтіп, қорытынды аттестауға дайындық шаралары талқыланды. Оқушылар ана тілінен жазбаша емтихан тапсырып, оны орындауға екі сағат бөлінеді. Емтихан материалдарын Білім және ғылым министрлігі әзірлейді. Емтихан аяқталғаннан кейін комиссия мүшелері білім алушылардың жұмыстарын тексеріп, қателердің асты сызылады. Эсседе қателердің саны жеке көрсетіледі.
Пәндер бойынша қорытынды аттестаттау нәтижелері балл түрінде журналға қойылып, бес балл бойынша бағаланады. Тоқсандық бағалар 30-70 пайыздық қатынаста анықталады. Қорытынды бағаны дөңгелектеу ең жақын бүтіндікке қарай есептеледі.
Пән мұғалімдері сынып оқушыларын қорытынды аттестаттауға даярлап, ерекшеліктері мен өзгешеліктерін түсіндіруге міндетті. Мұғалім-тренерлердің, әдіскерлердің көмегімен тапсырмаларға арналған семинарлар өткізіледі, – дейді Әсел Қайырқызы.