Soltüstık Казахстан
Мал шаруашылығы – атадан келе жатқан кәсіп түрі. Мемлекет тарапынан бұл салаға жыл сайын айрықша қолдау көрсетіледі. Былтыр “Ауыл шаруашылығын қаржылай қолдау қоры” акционерлік қоғамының облыстық филиалы 526 млн. теңгенің 30 жобасын қаржыландырған. “Мал шаруашылығын дамыту” бағдарламасы аясында шаруа қожалықтары 1400-ге жуық ірі қара сатып алып, бизнес аясын кеңейткен. Басым бөлігі Уәлиханов, Мағжан Жұмабаев, Тайынша және Ақжар аудандарына тиесілі.
Зеңгі баба тұқымын өсіруді қолға алғандардың бірі – “Қуаныш” фермерлік қожалығы. Уәлиханов ауданындағы Өндіріс ауылында орналасқан шаруашылықтың басшысы Қуаныш Уәлиев 2015 жылдан бері атакәсіппен айналысуда. Сол уақытта алғаш рет мемлекеттік бағдарламаның көмегіне жүгінген. Екінші деңгейлі банктердің бірі бөлген 9,6 млн. теңгеге қажетті техника мен 21 бас ірі қара сатып алған. “Еңбегіне қарай өнбегі” демекші, Қуаныш Уәлиев мұнымен тоқтап қалмай, “Ауыл шаруашылығын қаржылай қолдау қоры” АҚ-ның облыстық филиалы арқылы 22,5 млн. теңге алып, қорасын 70 бас тайыншамен толтырады.
– Мемлекеттік қолдаудың арқасында арманым орындалды. Бағдарлама аясында алған несие де тиімді. Жылдық мөлшерлеменің тек 6 пайызын өтеймін, ал қалғаны субсидияланады. Жыл сайын дәнді дақылдар егемін. Яғни, малдың жемазығын өз күшіммен дайындаудамын, – дейді шаруашылық басшысы.
Бүгінде кәсіпкердің қорасында 95 ірі қара мен 40 жылқы бар. Ауылдың екі азаматына жұмыс беріп отыр. Көктемде Ғабит Мүсірепов атындағы ауданнан жеткізілген сиырлар жақында бұзаулайды. Сол кезде қосымша жұмыс күшін тартуды жоспарлауда.
Ал Тайынша ауданындағы Чкалово ауылының тұрғыны Михаил Мартысевич фермерлік қожалығын 2019 жылы ашқан. Бала кезінен қазақы ортада тәрбиеленген ол жылқы шаруашылығымен айналысуға ұйғарған. Бүгінгі таңда тайыншалық азамат басқарып отырған “Қарғалы” шаруашылығында 83 жылқы бар.
– “Мал шаруашылығын дамыту” бағдарламасы өте тиімді, жеңілдетілген несие қалта қақпайды. Екі жыл бұрын 3,5 млн. теңгенің несиесіне 10 жылқы сатып алдым. Малды өсіріп мол пайдаға кенелуге болатынына көз жеткіздім. Сондықтан бастаған ісімді жалғастырып, былтыр тағы да осы бағдарламаның көмегіне жүгіндім. Бұл жолы 12 млн. теңгеге тағы 25 жылқы алдым, – деген Михаил Мартысевич көктем айларында мал бордақылау алаңын тұрғызуды жоспарлап отырғанын жеткізді.
Қазақтың жанына жақын мал шаруашылығымен, соның ішінде сиыр бағумен айналысатын кәсіпкер Әйбек Әукеновтің өмірлік қағидасы да осы. Кәсіпкер алғашында жылқы ұстаған. Айыртау ауданындағы Красногорка ауылының тұрғыны 51 симменталь тұқымды тайынша сатып алыпты. Енді шаруашылығын кеңейтуді жоспарлап отыр.
– Мал шаруашылығымен айналысу пайдалы кәсіп болған соң бастадым. Әзірге қорадағы қара малдың саны аз. Дегенмен, болашаққа жоспарларым бар. Олар іске асса, кәсібім өрге басуы тиіс, – дейді іскер азамат.
Аманжол НҰРТАЗИН,
“Soltüstık Qazaqstan”.
СУРЕТТЕ: “Қуаныш” фермерлік қожалығының басшысы Қ.УӘЛИЕВ.