Soltüstık Казахстан
Бүгінгі өмірімізді газсыз елестету қиын. Тағамды тез пісіріп, суыған тамақты лезде жылыта аламыз. Алайда, оның пайдасымен қатар, зияны да бар екенін ұмытпаған жөн. Мұндай олқылықтар, әдетте, қарапайым қауіпсіздік ережелерін сақтамағандықтан орын алады. Сондықтан газ баллондарын қолданудың ережесін білген жөн.
Тұрмыстық газдың – түсі де, иісі де жоқ. Сол себепті газ станцияларында оның құрамына одоранит қосады. Яғни, иіс арқылы баллондарда ақау барын білуге болады. Газ баллондарын қолдану Қазақстан Республикасының “Газ және газбен жабдықтау туралы” 2012 жылғы 9 қаңтардағы №532-IV Заңында көрсетілген. Аталмыш заңның 7-бабы 5-тармағының 6-1 тармақшасына сай, жергілікті атқарушы органдар елді мекеннің шекараларында тұрмыстық және коммуналдық-тұрмыстық тұтынушылар тарапынан баллондарды қауіпсіз пайдалану талаптарының сақталуына мемлекеттік бақылау жүргізеді. Сондай-ақ, тұтынушылар сұйылтылған мұнай газын бөлшек саудада өткізуді жүзеге асыратын газ желісі ұйымымен немесе газ толтыру пунктінің иесімен техникалық қызмет көрсету бойынша келісімшарт жасасады. Олар баллондардың техникалық жай-күйін қамтамасыз етуге міндетті.
Жоғарыда аталған ұйымдар тұтынушыларды абоненттік есепке алуды жүзеге асыруға, толтырылатын тұрмыстық баллондардың техникалық ақауын тексеруге, тауарлық белгісімен таңбалауды жүзеге асыруға міндетті. Сатылатын әрбір баллонға кепілдік сапа талоны берілуі тиіс. Газ баллоны қондырғыларына апаттық және жоспарлы қызмет көрсетуді қамтамасыз етеді.
Ережеге сәйкес сұйылтылған мұнай газы құйылған баллондарды екі қабаттан асатын көппәтерлі тұрғын үйлерде сақтауға және пайдалануға болмайды. Газ баллондарында ешбір ақау болмауы тиіс. Әр баллонның ілеспе құжаттары дұрыс болуы керек. Сыйымдылығы 27 және 50 литрлік баллондардың сырты қызыл түсті болып, бүйірінде “ПРОПАН” деп жазылады. Бұрыштық вентильде бұрандасын қорғайтын бітеуіштің қойылуы аса маңызды. Қорғаныш қалпағы орнатылады. Ол механикалық зақымданудан қорғайды.
Баллонның паспортында газдың салмағы, жұмыс қысымы мен кезекті техникалық куәландыру мерзімі көрсетілуі қажет. Қақпағында резеңке тығыздағыш сақина тұруы шарт. Пішіні бұзылған, терең сызаттары, жарықтары, коррозиясы бар және төлқұжаты жоқ баллондарды пайдалануға рұқсат берілмейді.
Автомобильдік газ құю станцияларында тұрмыстық баллондарды толтыруға тыйым салынған. Өлшеусіз толтырылған баллоннан газ шығу қаупі жоғары болады. Ал бұл өз кезегінде өртке ұласуы мүмкін екенін ескертеміз. Баллонды орнатқаннан кейін оның бүтіндігін сабын эмульсиясының көмегімен тексеріңіз. Егер бүтіндігіне күмән келтірсеңіз, пайдаланбаңыз. Себебі, өміріңіз бен денсаулығыңызға деген салғырттықтың салдары қайғылы аяқталуы мүмкін.
Арман БӘСЕНОВ,
Индустриялық даму және өнеркәсіптік қауіпсіздік комитеті облыстық департаментінің бас маманы.