Soltüstık Казахстан
1949 жылдың 9 шілдесінде Солтүстік Қазақстан облысының Шал ақын (бұрынғы Сергеев) ауданына қарасты Балуан ауылында дүниеге келді.
Еңбек жолын өзінің туған ауылында шопан, тракторшы болып бастаған ол Солтүстік Қазақстан облыстық «Ленин туы» (қазіргі «Солтүстік Қазақстан») газетінде кіші әдеби қызметкер, әдеби қызметкер, тілші, бөлім меңгерушісі міндеттерін атқарды.
1987-2003 жылдар аралығында «Қазақстан теледидары мен радиосы корпорациясы» жүйесінде, «Азаттық» радиосында қызмет істеді. Солтүстік Қазақстан облыстық радиосы бас редакторының орынбасары, бас редакторы, Қазақ радиосының Солтүстік Қазақстан облысы бойынша меншікті тілшісі, Солтүстік Қазақстан облыстық телерадиокомпаниясының ақпараттар бағдарламасының жетекшісі, бас редакторы, директордың орынбасары болды.
2003 жылдың мамыр айында «Солтүстік Қазақстан облыстық «Солтүстік Қазақстан» газеті мемлекеттік коммуналдық кәсіпорынының» директоры – бас редакторы болып тағайындалды.
2007 жылғы 18 тамызда «Нұр Отан» халықтық демократиялық партиясының тізімі бойынша Қазақстан Республикасы Парламенті Мәжілісінің депутаты болып сайланды.
2012 жылдың сәуір айынан 2014 жылдың сәуір айына дейін «Егемен Қазақстан» газеті бас редакторының орынбасары болды. 2007 жылдан «Мағжан» әдеби-көркем, қоғамдық-саяси журналының бас редакторы. 2014 жылдан Қазақстан Жазушылар одағы Солтүстік Қазақстан облыстық филиалының директоры. Қазіргі таңда «Қызылжар-Ақпарат» ЖШС-нің директоры.
«Көмескі із», «Еменнің иір бұтағы», «Сөнбейтін шырақ», «Далабесік», «Шынның жүзі», «Өмір – өзен» кітаптарының авторы. Сондай-ақ, ол Мағжан Жұмабаев, Қожаберген Толыбайұлы, Сары батыр, ІІІал ақын, Есләм Зікібаев, Иван Шухов сынды тұлғалардың өмірі мен шығармашылығы жайында баяндайтын оннан астам кітап құрастырып, оқырманға ұсынды.
«Құрмет», «Достық» ордендерімен, бірнеше медальдармен марапатталған, Солтүстік Қазақстан облысының құрметті азаматы, Қазақстан Жазушылар одағының мүшесі, Қазақстан Журналистер одағы сыйлығының лауреаты, Қазақстанның құрметті журналисі.