Soltüstık Казахстан
Дәрігерлерді жасөспірімдер арасында түрлі кеселдердің дендеп бара жатқаны алаңдатады. Солардың ішінде семіздік ауруы денсаулыққа аса қатерлі екенін баса айтқымыз келеді.
Былтыр 14 жасқа дейінгі 210 балаға шамадан тыс артық салмағы үшін семіздік диагнозы қойылды. Қолдағы мәліметтер бойынша елімізде бастауыш сынып оқушыларының 5 пайызы семіздік ауруына шалдықса, 10 пайызының артық салмағы бар. Негізінен дұрыс тамақтанбаудың ақыры семіздікке соқтыратыны тәжірибеден белгілі. Ғылыми зерттеулерге сүйенсек, оқушылардың 80 пайызы оңай сіңетін көмірсулар, майлар мен натрийді шамадан тыс тұтынудан ағзаға қажетті дәрумендерді, минералдарды аз қабылдайды.
Семіздіктің салдары өте қауіпті: бала нашар оқиды, баяу ойлайды, тез шаршайды, тағысын тағылар. Дүниежүзілік денсаулық сақтау ұйымы келтірген деректерге қарағанда, артық салмақтың шамадан тыс қосылуына тамақтану сапасы, тамақтану тәртібінің бұзылуы басты себеп болып табылады.
Бүгінде дүкен сөрелерінде, дәмханалар мен мейрамханалар мәзірінде жиі кездесетін фастфуд балалар арасында ерекше сұранысқа ие. Сэндвич, хот-дог, пицца, құймақ, шаурма, фри картобы, бургерлерді дайындауда сапасы төмен шикізат қолданылады. Фастфудқа жататын барлық тағамдар майлармен, қантпен қаныққан және оларда ағзаға қажетті дәрумендер мен минералдар жоқтың қасы. Мұндай өнімдермен тамақтану іш қатуға, ішек микрофлорасының бұзылуына әкеледі. Фастфудты тағам ретінде пайдалану семіздікке, иммунитеттің төмендеуіне және ас қорыту жолдарының бұзылуына әкеледі. Қант диабеті қаупін арттырады.
Гүлнәр СЕЙІТОВА,
санитарлық-эпидемиологиялық бақылау департаменті білім беру және тәрбиелеу обьектілерін қадағалау бөлімінің жетекшісі.