Soltüstık Казахстан
Өңірімізде педагогтардың кәсіптік қызметін реттейтін, олардың құқықтарын қорғап, әдеп нормаларын бұзудың алдын алатын жаңа ұйым пайда болды. Бұл туралы облыстық білім саласында сапаны қамтамасыз ету департаментінің басшысы Айнагүл Сұрағанова қашықтан өткен брифинг барысында айтты.
“Педагог мәртебесі туралы” Заңның жаңашылдықтарының бірі – білім беру ұйымдары педагогтарының құқықтарын қорғау және педагогикалық әдеп мәселелері жөніндегі кеңесші органдардың құрылуы. Аталған ұйым өткен жылы қанатқақты жоба ретінде Нұр-Сұлтан қаласында жұмыс істеді. Биыл ел өңірлерінде, соның ішінде біздің облыста құрылды. Оның құрамында білім беру саласының ардагерлері, облыстық және қалалық мәслихат депутаттары, жергілікті кәсіпкерлер палатасы, салалық білім және ғылым қызметкерлері кәсіптік одағының облыстық ұйымы, білім басқармасы, Петропавл қалалық білім бөлімдерінің өкілдері мен мұғалімдер бар.
– Кеңесші органға бірқатар міндеттер жүктелген. Кеңес мүшелері білім беру ұйымдары жанынан құрылған әдеп жөніндегі кеңестердің жұмысына да мониторинг жүргізеді. Мәселен, наурыздың 29-ы мен сәуірдің 8-і аралығында өткізілген мониторингтің нәтижелері бойынша семинар өткізілді. Тиісті ұйымдарға осы бағыттағы жұмысты жақсарту бойынша ұсыныстар берілді, – деді Айнагүл Сұрағанова.
Педагогикалық әдеп жөніндегі кеңес өңіріміздегі 559 білім беру ұйымында құрылды. Олардың дені мектептерде жұмыс істеуде. Сонымен қатар, қосымша білім беру, мектепке дейінгі тәрбие мен оқыту ұйымдарында, техникалық және кәсіби білім беру мекемелерінде, психологиялық-педагогикалық түзету кабинеттерінде де бар. Осы уақытқа дейін кеңесші орган 875 отырыс өткізіп, 42 өтінішті қарады. Мұғалімдер көбінесе әріптестерімен және басшылықпен арадағы келіспеушіліктерге қатысты мәселелерге шағымданыпты.
– Кеңес мүшелері тек ұсыныстар жасауға құзырлы. Олардың негізінде білім беру ұйымының басшысы мұғалімді тәртіптік жауапқа тарту туралы акт қабылдайды. Ұстазға қатысты талқылаулар және олардың негізінде қабылданған шешімдер тек аталған тұлғаның келісімімен ғана жариялануы мүмкін, – деді Айнагүл Сұрағанова.
Гүлмира ШОҚТЫБАЕВА,
“Soltüstık Qazaqstan”.