Биылдан бастап білім беру саласын басқару жүйесі өзгереді. Аудандық және қалалық білім бөлімдерін қаржыландыру және басқару құзыреті облыстық білім басқармаларына беріледі, талап мектептер мен балабақшаларға қатысты. Бұл жалпы білім беру саласы үшін өте маңызды қадам болып табылады. Мектептер мен балабақшалар облыста бір орталықтан ғана басқарылса, қаржыландыруды теңестіру және арттыру мәселелері кешенді түрде шешілетін болады.
Жаңашылдық туралы Білім және ғылым министрі Асхат Аймағамбетов те өз пікірін білдірген болатын. “Білім беруді басқару органдары жүйесінің дұрыс ұйымдастырылуы – білім беру тиімділігін арттырудың маңызды шарттарының бірі. Сарапшылар аудандық, қалалық және облыстық білім бөлімдері мен басқармаларының өзара байланысы мен жұмыс жүргізу жүйесіндегі кемшіліктер туралы ұзақ уақыт бойы айтып келеді”, – деген министр.
Әсел ОРАЗБАЕВА,
облыстық білім басқармасының баспасөз хатшысы.