Елімізде “Қазақстанның оқырман ұрпағы – 2021” жалпыұлттық акциясы өтіп жатыр. Бұл бастаманы балалар мен жасөспірімдердің кітап оқуын қолдау мақсатында Қазақстан Республикасының Мәдениет және спорт министрлігі жүзеге асыруда. Өңірдегі кішкентай оқырмандардың көркем әдебиетке қызығушылығын оятып, кітап оқу мәдениетін қалыптастыруға бағытталған шаралар Ғабит Мүсірепов атындағы облыстық балалар мен жасөсірімдер кітапханасында да қолға алынды.
1963 жылы қазығы қағылған руханият ордасында бес бөлім жұмыс істейді. Кітапхана қорында ұлттық әдебиет және мәдениет, өнер салалары бойынша балаларға арналған 213 мың кітап бар. Жасыратыны жоқ, соңғы уақытта балалардың көркем әдебиет оқуға деген қызығушылығы бәсеңдеп барады. Оның себебі әртүрлі. Біз осы олқылықтың орнын толтыруды көздейміз.
Акция аясында кітап оқу марафондары, челлендждер, флешмобтар, “дөңгелек үстелдер” ұйымдастырылуда. Сондай-ақ, балалар назарына театрландырылған қойылымдар ұсынылып, кітаптар табыс етілуде. Мәселен, наурыз айында Петропавл қаласындағы отбасылық үлгідегі балалар ауылы тәрбиеленушілері кітапханада өткен танымдық шараға қатысты. Оларға қызықты кітаптар сыйға берілді. Алдағы уақытта олар біздің тұрақты оқырмандарымыздың қатарынан көрініп, бос уақыттарында көркем әдебиет оқуды жақсы әдетке айналдырады деген сенімдеміз.
Ал жас оқырмандарымыз “Оқитын автобус” атты шарадан ерекше әсер алды. Кітапхана қызметкерлері түрлі ертегі кейіпкерлерінің бейнесінде қоғамдық көлікте балалармен кездесті. Кішкентай жолаушыларға буклеттер мен кітаптар сыйлап, оларды уақытты ұтымды пайдаланып, ертегілер, әңгімелер оқуға шақырды.
Қазір ай сайын кітапхана мамандары 50 шақты іс-шара ұйымдастырады. Пандемияға байланысты олардың дені онлайн өтуде. “Библиоглобус”, “білім сағаттары”, “отбасылық оқу”, “бірге оқимыз” деген айдарлармен алуан түрлі шараларға балалар қашықтан белсенді қатысуда. Атаулы күндер де ескерусіз қалмайды. Танымдық кездесулер ұйымдастырылады. Ал өнер бөлімі көбінесе театрландырылған көріністерді көрсетеді. Мұндай шаралар гаджеттерден қолы босаған өскелең ұрпақтың кітап оқуларына, білімдерін молайтуға өз септігін тигізеді.
Біз облыстағы көптеген мектептермен тығыз байланыстамыз. Алда ауқымды жоспарларымыз бар. Күш атасы – Қажымұқан Мұңайтпасовтың туғанына 150 жыл толуына орай және орыстың ұлы ақыны Александр Пушкиннің “Пиковая дамасы” туралы танымдық кеш, жергілікті ақын, ардагер журналист Тоқтар Зікіриннің “Жүрек сыры” жинағының таныстырылымы, Ахмет Жұбановтың 115 жылдығы мен 1 мамыр – Қазақстан халқының бірлігі күніне орай бірқатар шараларды өткізу көзделуде. Біз қауіпті індеттен құтылып, қалыпты тіршілікке оралар сәтті тағатсыздана күтудеміз. Сондықтан кішкентай оқырмандарымызбен кітапхананың кең залдарында қауышатын күн әлі алда.
Ғалия ЖҰМАҒҰЛОВА,
Ғабит Мүсірепов атындағы облыстық балалар мен жасөспірімдер кітапханасының директоры.