Soltüstık Казахстан
Петропавлда түзету мектебінің оқушылары балаларды қорғау күні қарсаңында өрт сөндіру бөлімшесінде болып, өрт қауіпсіздігі ережелерімен танысты, деп хабарлайды ҚазАқпарат тілшісі.
Солтүстік Қазақстан облысы төтенше жағдайлар департаменті баспасөз қызметінің мәліметінше, мүмкіндігі шектеулі балаларға арналған Петропавлдағы № 2 түзету мектеп-интернатының 15 оқушысы облыс орталығындағы № 1 мамандандырылған өрт сөндіру бөлімшесіне экскурсияға барды.
«Біздің мақсатымыз – балаларға төтенше жағдай ұғымын түсіндіру, одан келер қауіпті түсіндіріп төтенше жағдай болғанда қайда, қандай телефон нөміріне хабарласуға болатынын жеткізу. Сондай-ақ өрт қауіпсіздігі ережелері туралы айттық. Өрттің неден шығатынын, отпен ойнаудың салдары қандай болатынын арнайы түсірілген бейнероликтер арқылы көрсеттік», – дейді өрт сөндіру бөлімшесінің басшысы Болат Жұмажанов.
Балалар сондай-ақ өртке қарсы қызметтің мұражайында болып, қызықты жәдігерлермен танысты. Музей 1980 жылдары құрылған. Мұнда өрт сөндіру қызметінің тарихымен танысып, қазіргі өрт сөндірушілердің жұмысы жайында мағлұмат алуға болады.
Оқушылар музейдегі жәдігерлерді қызыға тамашалап, көне өрт сөндіру құралдарымен танысып, басқа адамның өмірін құтқару барысында қаза тапқан батыр өрт сөндірушілер жайында білді.
Өрт сөндіру бөлімшесін аралап, техниканы, арнайы құралдарды көрді, өрт сөндірушілердің киімдерін киіп, суретке түсуге мүмкіндік алды.
«Петропавлдың оқу орындары біздің бөлімшедегі музейді келіп көруге, экскурсия ұйымдастыруға үнемі рұқсат сұрап жатады. Біз, әрине, балаларды қарсы алып, оларға біздің жұмысымыз жайында айтуға, техникамызды, киім-кешегімізді көрсетуге қарсы емеспіз. Өрт сөндірушілер арасында ерлік жасаған әріптестеріміз аз емес, біз оларды жасөспірімдерге үлгі етеміз. Өрт қауіпсіздігі ережелерін еске саламыз», – дейді Болат Жұмажанов.
www.inform.kz