Soltüstık Казахстан
Журналистер арнайы жұмыс сапарымен Жамбыл ауданында болып, “Оңтүстіктен – Солтүстікке” мемлекеттік бағдарламасының орындалу барысымен таныстық. Ол жайлы аудандық жұмыспен қамту орталығы директорының міндетін атқарушы Самал Кариева айтып берді.
– Бағдарламаның басты мақсаты – халықты жиі шоғырланған өңірлерден жұмыс күші тапшы солтүстік аймақтарға орналастыру арқылы экономикалық және демографиялық тұрғыдан теңестіру болып табылады. 2017 жылдан бері 142 отбасы қоныс аударып, 131 адам жұмысқа орналастырылды. Өз кәсібін ашып, шаруасын дөңгелетіп отырғандар аз емес. Алғашқы жылы 9 отбасы көшіп келсе, биыл жыл аяғына дейін 43 отбасымен толығатын болады. Үкімет және жергілікті билік тарапынан ынталандырудың, әлеуметтік, тұрмыстық жағдай жасаудың барлық мүмкіндіктері қарастырылған. Осы жылы тұрғын үйлерді жалға алу үшін республикалық және жергілікті қазынадан 24,5 млрд.теңге бөлінді. Бұдан бөлек, көшіп келу шығындарына 31 млн. 744 мың теңге беріледі, – деді Самал Сансызбайқызы.
Түркістан облысының Сарыағаш ауданынан қоныс аударған Мағжан Ұзақбаев жүз жасаған Жамбыл ақынның атындағы ауданды аттай қалап алғанына еш өкінбейді. Мәдениет бөліміне жұмысқа орналасып, өзін “сегіз қырлы бір сырлы”, бесаспап музыка маманы ретінде дәлелдей білді. Жан жары – аудандық ішкі істер бөлімінде тергеуші. “Жайлы орын қарастыра келіп, табиғаты қолайлы, халқы кеңпейіл осы ауданға тұрақтауды ұйғардық. Баспанамыз, қызметіміз бар. Тұрмысымыз жақсы. Қызымыз Әдемі екі жаста”, – дейді тепсе темір үзетін азамат.
Ат басын Благовещенка ауылына тіредік. Бұрынғы аудан орталығын абаттандыру жұмыстары қызу қарқын алған екен. Жолдар жөнделіп, көшелерге шамдар орнатылған. Шағын саябақ – тұрғындардың сейілдейтін, бас қосатын сүйікті орындарының бірі. Түнде айнала самаладай жарық. Екі мектеп күрделі жөндеуден өткен.
Ауылға кіре беріс оң жақта бірнеше жаңа үй қаз-қатар сап түзеген. Оларды тұрғызумен “Оңтүстіктен – Солтүстікке” бағдарламасы арқылы осында көшіп келген түркістандық ағайындар айналысуда. Солардың бірі Базархан Бақтыбайұлын әңгімеге тарттық. Мамандығы денешынықтыру пәнінің мұғалімі болса да, құрылыс саласының кәнігі шебері екен. Он жылдан бері баспана тұрғызумен шұғылданып келеді.
– Көрші Майбалық ауылында үй салып жатырмыз. Іргетасын қалаудан бастап, барлық жұмыс аяқталған соң кілтін үй иесіне ұстатамыз. Бригада құрамында үш адам бармыз. Құрылыс материалдарымен қамтамасыз ететін де, жұмыс тауып беретін де – Маржан апайымыз. Бәрі жеткілікті, істе іркіліс жоқ. Жыл аяғына дейін 12 үй тұрғызбақ ойымыз бар, – дейді ол.
Благовещенка ауылдық округінің әкімі Тұрмыс Иманжанов Майбалықта 40 үй, 178 адам қалғанын, 9 жылдық мектепте 32 оқушы ғана оқитынын, тұрғындар санын күнгейлік бауырлар есебінен толықтыру мақсатын көздеп отырғанын жеткізді.
Түркістандық Бағлан Айтжанов көрші Богдановкада тұрғанмен, ол да құрылыс бригадасы құрамында еңбек етеді. Мамандығы – жүргізуші. Келіншегі үш баланы бағып, үй шаруасымен айналысады.
Оңтүстік жақтардан осында қоныстанған азаматтардың басын қосып, жұмыспен қамтамасыз етіп отырған Маржан Абайқызымен де жолығысып, тілдесудің сәті түсті. Құрылысшылар бригадасын ұйымдастырған – осы қарындасымыз. Баспананы өздері үшін салатындықтан, сапасына мін айту қиын. Кем-кетік шығып жатса, өздері жауап береді. Үйренетін үрдіс!
Осыдан жеті жыл бұрын елордаға жұмыс іздеп келіп, аяқасты Жамбыл ауданына тап болған Маржан жайлы әңгіме бөлек. Осы уақыт аралығында 53 отбасын қалай қоныстандырғаны жайлы газетте кейінірек әңгімелейтін боламыз.
Өмір ЕСҚАЛИ,
“Soltüstik Qazaqstan”.