Soltüstık Казахстан
Тайынша ауданындағы Аймақ ауылының бір көшесіне ақын, сазгер Тыныштық Шаменовтің есімі берілді.
Тыныштық Шаменовтің аты Аймақ ауылы тұрғындарының арасында ерекше ілтипатпен аталады. Ақынның “Аймағым – атамекенім” атты әні ауылдың әнұранына айналғандай. Елді мекенде өтетін кез келген іс-шара шымылдығы:
“Аймағым, менің Аймағым,
Жап-жасыл орман жан-жағың,
Жаныңнан сенің өткенде,
Оралар ойға жас шағым!..”, – деген шумақпен ашылады.
Жергілікті тұрғындар ауылдағы бір көшені ақын есімімен атау туралы бастаманы бұдан бірнеше жыл бұрын көтерген болатын. Таяуда игі іс жүзеге асып, ауылда салтанатты іс-шара өтті. Амандық ауылдық округі әкімінің міндетін атқарушы Болат Қуандықұлы ақынның шығармашылығына тоқталып, Тыныштық Шаменовтей ел азаматының ғибратты ғұмыры мен өнегелі өмірі өскелең ұрпаққа үлгі-өнеге екендігін айтты. Жиында ақынның жары Сәбира Жаныбайқызы, ұлы Сағынай Тыныштықұлы да сөз сөйлеп, жиналған қауымға ақжарма тілектерін білдірді.
Рабиға ЕРАЛЫ,
“Soltüstık Qazaqstan”.