Soltüstık Казахстан
Барша әлем сүйсіне қарайтын еліміздің бас шаһары – Нұр-Сұлтан қаласының астана атанғанына биыл 23 жыл толды. Жас мемлекеттің елордасы осы жылдар ішінде көз ілеспес жылдамдықпен дамып, құлпыра түсті. 6 шілде – Астана күнін биыл қазақстандықтар ашық аспан астында атап өтуге мүмкіндік алды.
Қызылжарлықтар елорда күнін тойлауды облыстық тарихи-өлкетану мұражайының алаңындағы “QYZYLJAR” ART-орталығынан бастады. Мұнда “Ермек Серкебаев атындағы өнер колледжі – дарынды балаларға мамандандырылған мектеп-интернат” кешені әншілерінің орындауындағы әсем әндер көпшілікті бір серпілтіп тастады. Сонымен қатар аталмыш білім ордасы шәкірттерінің жұмыстары қойылған “Тәуелсіздік ұрпағы” атты көрме келушілердің көңілінен шықты.
– Еліміз үшін айтулы мереке күні отбасымызбен ән тыңдап қайтуды жөн көрдік. Елордамыз аз уақытта ел мерейін тасытқан қалаға айналды. Біз сүйікті елорда күнінде жылда тынығуға Нұр-Сұлтанға баратынбыз. Биыл осынау күнді Қызылжарда атап өтуді жөн көрдік. Жуырда ғана ашылған ART-орталықтың бос уақытты тиімді өткізуге таптырмас орын екеніне көз жеткіздік, – деді қала тұрғыны Сәлима Есенгелдіқызы.
Әсем әуен тыңдап, көңілдері көтерілген тұрғындар бұдан әрі ART-орталықта ұйымдастырылған “Ел жүрегі – Нұр-Сұлтан” атты фотосуреттер көрмесін тамашалады. Бұл маңайға елорданың тарихынан сыр шертетін картиналар қойылып, көпшілік астана жайлы танымдық ақпараттарды санасында бір жаңғыртты. Әсіресе “Ақ орда” резиденциясының, цирктің, “Астана салтанаты” тұрғын үй кешенінің фотосуреттері көрерменнің қызығушылығын оятты. Бұдан бөлек, Сәбит Мұқанов атындағы облыстық ғылыми-әмбебап кітапхананың қызметкерлері “Жаса, жайна ару қалам – Нұр-Сұлтан” атты интерактивті алаң ұйымдастырып, оқырман қауымның назарына елорда жайлы кітаптарды ұсынды.
Сәулеті мен сәні келіскен, еңсесі биік Нұр-Сұлтанды ән мен жырға қосқан өнерпаздар, тарихи-танымдық тұрғыдағы шаралар тұрғындардың көңілінен шықты. Қызылжарлықтар таң атқаннан күн батқанға дейін Астана күнін сән-салтанатымен атап өтті.
Нұржан СЕЙІЛБЕКОВ,
“Soltüstık Qazaqstan”.