Soltüstık Казахстан
Облыс мешіттерінің қызметкерлері коронавирусқа қарсы екпе салдыртуда. Дін жолында жүргендердің таңдауы қытайлық “Sinopharm” компаниясы шығарған “Vero Cell” вакцинасына түсті.
“Қызылжар” орталық мешітінің бас имамы Кенжетай қажы Байкемелұлы және Петропавлдың бір топ имамы облыс орталығындағы емдеу мекемесіне жүгініп, вакцина алды.
– Жұқпалы ауру саябырситын емес. Онымен көп болып күресуіміз қажет. Қазіргі уақытта аурудың таралуын болдырмау үшін вакцина алу маңызды. Шариғатымыз да денсаулық мәселесінде “әр аурудың шипасы бар, емделіңдер” деп мұқияттылық танытуды талап етеді, – дейді Кенжетай қажы Байкемелұлы.
Облысқа қытайлық “Vero Cell” вакцинасының 13,5 мың дозасы жеткізілген болатын. Бүгіндері өңірде 60 мешіт бар, онда шамамен 100-ден астам діни қызметкер жұмыс істейді. Олардың жартысынан көбі екпе алып үлгерді.
Аманжол НҰРТАЗИН,
“Soltüstık Qazaqstan”.