Soltüstık Казахстан
Солтүстік Қазақстан облысында квазимемлекеттік сектор субъектілерінің өкілдері үшін “бармақ басты, көз қысты” әрекеттің алдын алуға арналған семинар-кеңес ұйымдастырылды. Семинар-кеңеске қызметкерлерінің саны 400-ден асатын өңірдегі ірі кәсіпорындардың басшылары мен комплаенс офицерлері қатысты.
Көптің талқысына түскен мәселе – квазимемлекеттік секторға ISO: 37001 халықаралық стандартын және сыбайлас жемқорлыққа қарсы комплаенс институтын енгізу. Сондай-ақ жемқорлыққа қарсы іс-қимыл жөніндегі алдағы жұмыс жоспарлары қаралды.
Сыбайлас жемқорлыққа қарсы іс-қимыл агенттігі Солтүстік Қазақстан облысы бойынша департаменті басшысының бірінші орынбасары Нұрлан Жахиннің айтуынша, өткізілетін іс-шаралардың сандық көрсеткіші маңызды емес, оның сапалы орындалуына көшу қажет. Осыған байланысты сыбайлас жемқорлыққа қарсы қызмет стандартты енгізуде әдістемелік қолдау көрсетеді.
Қазіргі уақытта комплаенс-қызмет облыстағы квазимемлекеттік сектордың 61 ұйымында енгізілді. Кеңеске “Protecting Business and Investments” жобасына қатысатын бизнес өкілдері шақырылып, жаман әдетті болдырмау бойынша атқарылған жұмыстың нәтижелерімен бөлісті.
Ақерке ДӘУРЕНБЕКҚЫЗЫ,
“Soltüstık Qazaqstan”.