Soltüstık Казахстан
Солтүстік Қазақстан мемлекеттік мүлік және жекешелендіру департаменті жекелеген негіздер бойынша мемлекет меншiгiне айналдырылған (алынған) мүлiктi есепке алудың, сақтаудың, бағалаудың және одан әрi пайдаланудың мәселелерiн Қазақстан Республикасы Үкіметінің 2002 жылғы 26 шілдедегі №833 қаулысымен бекітілген Ережеге сәйкес жүзеге асырады.
Мемлекет меншігіне алынған мүлік сот актілері, нотариус берген мемлекеттің мұрагерлік құқығы туралы куәліктер, кедендік декларациялау аяқталғаннан кейін мемлекет пайдасына бас тартудың кедендік рәсіміне сәйкес мәлімделген тауарларға арналған декларация, мемлекеттік меншіктің пайда болуын растайтын басқа құжаттар негізінде тіркеледі.
Мемлекет меншігіне айналдырылған (алынған) мүлікті қабылдау кезінде сыбайлас жемқорлық тәуекелдерін жою үшін сот орындаушылары немесе мүлікті алып қойған (тапсырған) органдар (тұлғалар) департаментке мүлікті беру күні, орны мен уақыты туралы жазбаша түрде хабарлайды. Құжаттардың көшірмелерін (атқару парағы, сот бұйрығы, сот үкімі, мұрагерлікке құқық туралы куәлік, тауарларға декларациялар және мемлекеттің меншігін растайтын басқа да құжаттар) кемінде бес жұмыс күн ішінде жолдауы тиіс.
Мемлекеттік қызметкерлердің немесе сыбайлас жемқорлыққа қарсы шектеулерді қабылдайтын басқа адамдардың алған сыйлықтары сыйлықты алған күннен бастап жеті күнтізбелік күн ішінде департаментке өтеусіз беру арқылы мемлекетке сыйлықтар болып саналады және мемлекеттік меншікке алынады. Мемлекеттік қызметкер алынған сыйлықты тапсырған кезде жазбаша сатып алудан бас тарту туралы хабарламаны қоса береді.
Сыйлықты тапсырған адам жоғары тұрған лауазымды адамның келісімімен оны сатып алуға құқылы. Сатып алу – сату шарты сыйлықты алған адамнан хабарлама алған күннен бастап жеті күнтізбелік күн ішінде жүзеге асырылады. Сыйлықтан бас тартқан жағдайда ол сатылады.
Мүлікті департаментке беру мүлікті түгендеу, бағалау және мүлікті қабылдау-тапсыру актісін дайындаумен және мүлікті сақтау мен тасымалдау бойынша қызмет көрсетушілердің қатысуымен жүзеге асырылады.
Үстіміздегі жылдың тоғыз айында департаментке 50218 мүлік келіп түсті, оның ішінде құрамында алкоголь бар өнімдер 45923 литр және 2827 бөтелке алкогольдік сусындар (құны 82569554 теңге), 1400 кг. қара металл сынықтары ( құны 81900 теңге) , 52 дана ұялы телефон, ноутбук, тұтыну тауарлары (құны 1368158 теңге) және т.б., сонымен қатар Ресей Федерациясында тіркелген 11 бірлік автокөлік (құны 14517505 теңге), 5 дана 2 сыйлық (бағалық құны 10414 теңге) болды.
Оксана ШАЙМАРДАНОВА,
Солтүстік Қазақстан мемлекеттік мүлік және жекешелендіру департаменті жекелеген негіздер бойынша түскен мүлікпен жұмыс бөлімінің бас маманы.