Елімізде екі айға созылған емханаларға тіркелу науқаны аяқталды. Биылғы шараға облыс бойынша 13 аудандық аурухана, 3 емхана мен “Денсаулық” жеке коммерциялық емес мекемесі қатысты.
Кезекті тіркеу науқаны кезінде азаматтарға, егер олар қандай да бір себептермен бекітілген емханаға сәйкес келмесе, егер тұрақты немесе уақытша тұратын, жұмыс істейтін немесе оқитын жері өзгерсе, сондай-ақ алғашқы медициналық-санитарлық көмек ұйымы қайта ұйымдастырылған, таратылған жағдайларда өз қалауы бойынша емхананы ауыстыру мүмкіндігі берілді. Тұрғындарға емхананы таңдау мүмкіндігінен басқа, тіркеу науқаны жаңа медициналық қызмет көрсетушілерге тапсырыс алуға мүмкіндік береді.
Облыс бойынша 29217 адам тіркелу науқаны аясында емхананы таңдау құқығын пайдаланды. Тіркелу науқаны кезінде таңдалған емханада қызмет көрсету 2022 жылдың 1 қаңтарынан басталады. Оған дейін науқастар бұрын өздері қаралған медициналық ұйымда қызмет алады. Егер науқас емхананы ауыстырғысы келмесе, онда ол автоматты түрде мекенжайы бойынша емханаға тіркеледі.
Қарлығаш ІЛИЯСОВА,
әлеуметтік медициналық сақтандыру қоры облыстық филиалының бөлім басшысы.