«Soltüstık Qazaqstan»

PDF

ҚАРЫШТАП АЛҒА БАСҚАН БАС ҚАЛАМ

Soltüstık Казахстан

 Kyzylzhar_akparat@mail.ru

Асан бабамыздың желмаямен жаһанды кезіп, халқына құт мекен болатын жерұйықты іздеуінде жан тебірентерліктей сыр жатыр емес пе? Ұлытаудан басталар ұлы көшіміздің кеңес дәуірі кезін­де астана қазығын бірде Орын­бор, бірде Қызылордаға қадап, одан жасыл желекті, түсті кілем Алматыға тұрақтауы Мәскеудің пәр­менімен болған еді. Еліміз Тә­уелсіздігін алғаннан кейін ғана бас қаланы таңдау құқығы өзімізге берілді. Елбасымыз Нұрсұлтан На­зарбаев батыл қадам жасап, елордағы Арқа төріне көшірді. “Ас­тана – қазақ халқының жа­ңаруы­ның нышаны, үлкен үміт­тері ақи­қатқа айналған қала еке­нін қазақ­стандықтар күн са­йын сезінеді. Тұңғыш Президент – Елбасы Нұр­сұлтан На­зарбаев дүниежүзі­лік та­рихта жасампаз әрі ықпалды сая­саткер ретінде өз орны бар тұл­ғаға ай­нал­ды”, – деп жазған еді Мем­ле­кет басшысы Қасым-Жомарт То­қаев “Астана – Елбасы жі­ге­рінің жеңісі” атты мақаласында.

Мен Жамбыл ауданы әкімінің орынбасары, Петропавл қалалық құ­ры­лыс бөлімінің басшысы, об­лыс­тық сәулет және құрылыс бас­қармасы басшысының орын­ба­сары болдым, республикалық “Есіл су” кәсіпорнының филиалын басқардым. 2008 жылы елордаға қоныс аударып, содан бері Нұр-Сұлтан қаласының құрылыс сала­сына хал-қадірімше үлес қосып жүр­мін. Бастапқы жылдары “Жел­Дор­Строй” АҚ-ның вице-президенті, “Капитал трейд” ЖШС-нің директоры секілді қызметтер ат­қардым. Елордамызда өткен “ЭКСПО – 2017” халықаралық көр­месіне арнайы салынған бір­қатар құрылыс нысандарында өзімнің қолтаңбам қалғанын мақтаныш се­зіммен айта аламын. Қазақстан­ның құрметті құрылысшысы, “Ас­та­наның үздік жобалаушысы” атақ­тарына ие болдым, басқа да марапаттарым бар. Зейнет жасы­на келсем де еңбектен қол үзген жоқпын. Құры­лыс саласында қы­рық жылдан ас­там еңбек етіп, жи­наған бай тә­жірибемді жастарға үйретудемін. Соңғы бес жыл елор­дамызда са­лынып жатқан бір­қатар нысан­дар­дың сапасын ба­қы­лау сала­сын­да еңбек етіп жүр­мін, яғни тех­никалық қадағалау жөніндегі маманмын.

Елордамызда соңғы жылдары бой көтеріп жатқан ғимараттар­дың санында есеп жоқ. Мен тек бір мысалды келтіре кетейін. Ас­та­намызда 2019 жылы 2900 әлеу­меттік пәтер салынса, 2022 жылы ке­­мінде 10 мың осындай баспана­ның кілтін кезекте тұрған отба­сы­ларға тапсыру жоспарланып отыр. Сонымен қатар биыл пай­да­лануға берілген 15 мектепке 40 мыңға жуық оқушы барып жүр. Келесі жылы тағы да 16 мектеп бой көтермек.

Елордамыздың сұлулығы жер­гілікті тұрғындарды да, мей­ман­дар­ды да тамсандыратынына кү­мәнім жоқ. Кең жазира далада көсіліп жатқан кемел сұлулығы­мен, Есіл, Нұра секілді қыз бұры­мындай тарқатылған өзендерімен өзіне тартады. Қазіргі таңда аста­намыз әлемдік, іскерлік бай­ланыстың күре тамырына айна­лып отыр. Оның өзі Елбасының көрегендігі мен кемеңгер ойының жемісі деп білемін. “Астана – жаңа қала” арнайы экономикалық ай­ма­ғы құрылғаны белгілі. Бұл Есіл­дің сол жағалауына инвести­циялар тартуға, озық технология­ларды пайдалануға, сондай-ақ қа­зіргі заманғы инфрақұрылым ар­қылы құрылысты қарқынды түрде дамытуға бағытталған.

Елорданың өркендеуі – еліміз­дің өркендеуінің белгісі. Ендеше бас сәулетшісі Тұңғыш Президент – Елбасы Нұрсұлтан Назарбаев болып табылатын елорданың гүл­денуі мемлекетіміздің болашаққа нық сеніммен қадам жасауына сер­пін берері анық. Нұр-Сұлтан қа­­ласындағы балабақшаға бара­тын бес жасар немерем Сафина жуыр­да тәрбиешісі берген мына тақпақ­ты жаттап алып, үйге кел­ген соң біз­ге мақтанышпен айтып берді.

Болашаққа бастаған,

Шарықтайды асқақ ән.

Елордасы Отанның,

Мақтанышым – астанам.

Қарыштап алға бас қадам,

Елорда – елімнің жүрегі,

Нұр-Сұлтан – менің астанам.

Иә, бүлдіршіннің аузынан шық­қан, шын жүрегімен айтып берген бұл тақпаққа алып-қосарым жоқ. Елі­міздің жүрегі – Нұр-Сұлтан қа­ласы жылдан-жылға көркейе бер­сін!

Сермағамбет ҚҰТЫШЕВ,

экономика ғылымдарының кандидаты, Қазақстанның құрметті құрылысшысы.

Нұр-Сұлтан қаласы.

Әлеуметтік желілерде бөлісіңіз:

Share on facebook
Facebook
Share on telegram
Telegram
Share on whatsapp
WhatsApp