Soltüstık Казахстан
Тәуелсіздіктің 30 жылдық мерейтойы қарсаңында Қызылжар Абай орта мектебі республикалық “Таным” сыйлығының иегері атанды. Айтулы марапатқа білім, ғылым, ақпарат, дене шынықтыру және спорт саласындағы мақсаттарға қол жеткізгеніміз үшін ие болдық.
Петерфельд елді мекенінде орналасқан мектеп – мемлекеттік-жекешелік серіктестік негізінде “Bilim Ғoundation” қорының қаражатына жаңғыртылып, сенімгерлік басқаруға берілген озық жобалардың бірі. Мектеп толық жаңғыртудан өткеннен кейін Назарбаев зияткерлік мектептерінің ауыл мектептеріне бейімделген бағдарламасы негізінде білім беруге көшті. Инфрақұрылым түгенделіп, білім беру қызметінің сапасы айтарлықтай жақсарды.
Бүгінгі күні Қызылжар Абай орта мектебінің іс-тәжірибесін аудандық білім беру ұйымдары кеңінен пайдаланады. Мектеп директорлары мен орынбасарларына арналып арнайы тәжірибе алаңы құрылған. Онда зияткерлік мектептердің ауыл мектептеріне бейімделген бағдарламасын оқушыларға қалай игерту қажеттілігі үйретіледі.
Биыл мұғалімдердің ғылыми-зерттеу іс-тәжірибесі қайта жанданды. Қазіргі уақытта 10 ғылыми топ құрылып, өз жұмыстарын бастады. Оқушылар да ғылыми жобалар байқауларында жақсы жетістіктерге жетіп жүр.
Бұл – ауыл мен қала мектептері арасындағы алшақтықты жою мақсатында жүзеге асып жатқан үлкен жоба. Алдағы уақытта мектебіміздің көрсеткіштері жақсарып, қаладағыдан кем түспейді деген үміттеміз. Өңірде осындай жобалардың көбейіп, мектептердің заман талабына сай өркендеуіне тілектеспіз. Ең бастысы, оқу сапасын арттыруда жүйелі де кешенді шаралар басты негізге алынады. Тың жоба өзінің өміршеңдігін көрсетіп отыр. Демек, алар асулар алда деген сөз.
Әділбек ИСМАҒҰЛОВ,
Қызылжар Абай орта мектебінің директоры.
Қызылжар ауданы.